Editorial Un reunion bergonsoso tanto pa Gobierno como Parlamento Pa: Victor (Toko) Winklaar

Henter e scenario den ultimo dianan aki, ta mustra riba un ambiente di corupcion, di cosnan cu no ta bon, cu no ta legal y cu ta hiba pueblo bek den e tempo cu fraccionnan cu a sostene gabinete Wever Croes I, a landa y duna Minister encarga cu Serlimar, un tipop di’standing ovation.’
Dialuna mainta un scenario dilanti di Parlarmanto di Aruba cu a mustra riba e berdad bruha di un Gobierno cu no tin su prioridadnan na ordo y cu ta bibando di un scenario conflictivo p’e otro.
Pafo di edificio di Parlamento, un grupo grandi di trahadornan publico cu a bin busca nan derecho salarial bek for di Gobierno, cu a manipula formalmente cu e medida salarial tuma contra di e trahadornan aki y paden un reunion controversial riba un contract cu ya caba a wordo firma bao nanishi di un Gobierno cu ta pretende di ta goberna cu tur regla di integridad.
Henter fin di siman a tuma lugar diferente reunion di emergencia, relaciona cu e contracto cu WEB Aruba NV a firma cu e compania Eagle LNG pa un duracion di 20 aña y cu lo costa e compania estatal di awa y coriente, un suma di 80 miyon florin.
E ta un reunion bergonsoso te den su alma den cual lo bay discuti un asunto cu ya ta un hecho caba sigur ora cu tuma nota cu e contract aki a wordo firma for di dia 5 di november ultimo, pues casi un luna y mey despues esaki ta wordo discuti.
Pues e rol cu Parlamento mester a hunga den e reunion aki, tabata un rol di figurante, ya cu realmente e contract lo ta oficial caba, cu conocemento di algun Minister di gabinete Wever Croes II, manera entre otro Minister Glenbert Croes y Prome Minister Evelyn Weaver Croes.
Segun un comunicado emiti diabierna ultimo, partido RAIZ a confirma cu e contract aki no a wordo no trata y aproba den Conseho di Minister, pues sin informa of pone su partner den coalicion na altura, dirigentenan di MEP a bay over na firma e acuerdo aki cu lo tin consecuencia pa tur hende.
Ta tristo, pero mas cu tur cos bergonsoso ora cu pueblo tin cu scucha Minister Glenbert Croes, confirma cu e contract a wordo firma for di dia 5 di november y simbolicamente a bolbe firma esaki diahuebs siman pasa.
Tur esaki sin conocemento di nan partner RAIZ y loke ta ainda mas fatal, ta ora cu Minister Glenbert declara den conferencia di prensa, cu su persona no a mira e contracto di WEB y Eagle LNG, pues e no sa mes kico ta su contenido.

Ayera merdia ora cu Parlamento a ricibi representantenan di WEB y Eagle LNG, tur hende por a mira Glenbert mustra un ‘body language” di felicidad y respet ora cu e representante di Eagle LNG tabata contestando pregunta, mientras cu nunca el a mustra su colega di coalicion RAIZ, mesun respet aki durante di henter e formalisacion di e contract aki.
For di inicio di e reunion por a constata cu Gobierno a bin pa scapa cara, caminda Prome Minister Evelyn a hiba palabra den nomber di su Gobierno, pero ta su persona mes a informa algun dia atras, cu e no ta na altura di esaki.
Durante di su intervencion den e reunion aki, Prome Minister a trata un tipo di ‘damage control politico’ insistiendo riba maneho cu AVP a hiba den pasado, comparando appel cu peer, mientras cu ningun momento e por a splica di con su Gobierno a actua di e forma aki, sin envolvimento di su partner di coalicion.
Esey tabata un momento bergonsoso y unico ya cu mientras Prome Minister ta purbando na splica un decision di su Gobierno cu no por wordo hustifica cu otro mentira, pago den centenares di trahadornan publico, gritando pa Gobierno stop cu gañamento y elimina medida di 12.6%.
Ainda mas tristo ora c’un Parlamentario di fraccion di MEP, ta lanta pa mustra cu AVP a pidi un reunion, pero no a manda ningun pregunta, mientras cu Raymond Kamperveen di RAIZ kende ta colega di Tevreden cu ta sostene Gobierno, a manda un serie di pregunta for di dia 5 di november, pero aki e Parlamentario aki no a ni papia riba dje.

Hendrik Tevreden siman pasa a declara den un comunicado emiti cu como Presidente di Comision Fiho di Energia, e lo bay yama un reunion cu representantenan di WEB y Eagle LNG p’asina nan haya informacion, confirmando cu nan tampoco a wordo respeta como Parlamentarionan cu mestrer controla maneho di Gobierno.
Un situacion bergonsoso cu ta bolbe confirma cu te na momento cu generacionnan nobo di politiconan no mustra un mentalidad diferente, e tipo di actonan bergonsoso aki lo sigui tuma lugar.