Sr. Glenn Thomas ku pa años ta hasiendo un tremendo trabou spesialmente ku e deporte di baseball tresiendo masha hopi informashon di nos peloteronan den kas di tur hende ta preparando pa move pa e siudat di Williamsport kaminda e lo kubri partisipashon di nos selekshon di baseball Little League Liga Pabou na e mundial komo kampeon di Latino Amerika.

Glenn tabata ayera tardi na parke di Buena Vista kaminda e la hasi algun grabashon ku dirigentenan di Liga Pabou su Little League ku a hiba nan último training promé ku nan move mañan pa Williamsport.

Glenn ku pa años ta hasiendo un tremendo trabou a bisa 5 Star ku lamentablemente a bira sumamente difísil pa por haña spònser pa por kubri e gastunan pabo bai hasi reportahe o transmití wega.

E la splika ku porhempel pa Williamsport hotèl ta karisimo, i si bo suma tur kos ta papia aki di sigur 8000 florin pa kubri tur kos.

Baseball di mucha sin duda ta saka nos kara kada ratu, i e trabou di amigu Glenn ta realmente valioso.
E periodista stimá a rekonosé ku Refineria Isla i Sr. Kenneth Gijsbertha ta hasi hopi falta, paso semper nan tabata aportá. Di tur manera Glenn i su planta kanal-8 ta sigui hasi esfuerso pa tene nos Pueblo na altura di nos muchanan den eksterior. Prinsipalmente nos peloteronan !!