E palabranan di Hesus lo no pasa

Signonan di falta si speransa no semper ta kompletamente visibel, pues falta di speransa por disfrasá su mes di optimismo superfisial, aktivismo siegu òf pasotismo sekreto.

Di otro banda, bastante ta esnan ku no ta rekonosé di tin miedu, fèrfelamentu, soledat òf falta di speransa pasobra, segun e modelo sosial vigente, ta suponé ku un hende ku ta triunfá den bida no por sinti su mes su so, fadá òf ku miedu. Erich Fromm, ku su vishon normal, a señalá ku e hende kontemporáneo ta tratando di libra su es di algun represhon manera esun seksual, pero ta mira su mes obligá na «reprimí tantu miedu i duda komo depreshon, fèrfelamentu i falta di speransa».
Otro be nos ta defendé nos «bashí di speransa» hinkando no mes den e aktividat. Nos no ta soportá di ta sin ta hasi nada. Nos mester ta okupá den algu p’asina nos no ta enfrentá nos futuro.

Pero e pregunta ta inevitabel: kiko nos ta spera despues di tantu esfuerso, ilushon i disgustu? Nos no tin otro ophetivo sino produsí kada be mas, disfrutá kada be mihó loke a ser produsí i konsumí mas i mas, hasta ser konsumí pa nos propio tèrmino?
E ser humano mester di un speransa pa biba. Un speransa ku no ta «un ènvelòp pa resignashon», manera esun di esnan ku ta areglá pa organisá un bida lo bastante tolerabel manera pa wanta e aventura di kada dia. Un speransa ku no mester konfundí tampoko ku un espera pasivo, ku únikamente ta, ku frekuensia, «un forma disfrasá di falta di speransa i impotensia» (Erich Fromm).
Hende mester den su kurason un speransa ku ta mantené su mes bibu, aunke otro speransanan chikí ta mira nan mes frustrá i inkluso kompletamente destruí.

Nos kristiannan ta haña e speransa akí den Hesukristu i den su palabranan, ku «lo no pasa». Nos no ta spera algu ireal. Nos speransa ta apoyá su mes den e hecho firme di resurekshon di Hesus. For di Kristu resusitá nos ta tribi na mira bida den «estado di gestashon», manera simia di un bida ku lo alkansá su plenitut final den Dios.