E mester paga OM Naf. 1.85 mion…… Tempu ta kabando pa Schotte evitá di bai será 3 aña atrobe

WILLEMSTAD. E èks lider politiko di MFK, Gerrit Francisco Schotte tin un tarea di Hercules pa realisa i e tin solamente 10 dia pa kumpli ku esaki.

Den un grabashon ku ela sirkulá ayera Gerrit Schotte tabata pidi apoyo di tur esnan ku ta dispuesto pa kontribui na un kolekta pa sera e plaka ku e tin ku paga OM. I e tin solamente 10 dia pa termina e tarea pasobra sino e tin ku bai 3 aña será atrobe. No kabe duda ku ta diananan di alta tenshon pa Schotte kende for di e puesto politiko mas haltu den nos país a kai será i den su afán pa amasá poder i plaka hasta a purba lastra personahenan di alta alkurnia manera Emsley Tromp den su desgrasia ku preshon totalmente indebido. Awe Schotte ta pidi apoyo financiero pa no bai será i kuriosamente tur esnan ku a lanta tene na su kurpa a disparsé manera spiritu alma malu ku a mira krus. Schotte a lamenta ku bou di sirkumstansianan normal tur hende lo tin derechi di haña un areglo di pago pero esaki no a sosode kune.

Den su apelashon digital e ta referi ne hecho ku e tin un aña liber ku ela utilisa pa sera e suma pa no mester bai prizon atrobe. Basikamente si 1000 hende deposita 18.500 florin e por sera e suma ounke e ta rekonose ku den e lapso di tempu ku a keda e no tin manera di hasi e areglo di plaka.