E diálogo interior

Tur hende ta un ser sosial, habrí pa otro. Pa kualke persona, otronan ta parti importante di nan bida. Nan realisashon pleno komo persona ta inevitabel ligá na otronan, pasobra nos tur sa ku felisidat den hopi kaso ta dependé di e kalidat di nos relashon ku esnan ku ta krea nos sirkulo familiar, profeshonal, sosial, etc.

Sinembargo, no por lubidá ku hende no únikamente ta relashoná ku otro, sino tambe ku su mes: e ta mantené un kombersashon frekuente ku su propio intimidat, un diálogo ku ta bai den forma spontáneo na momento di e diferente òf eksperensia- òf reflekshonnan personal ku tur hende ta hasi kontinuamente ku nan mes.

I e diálogo interior aki por ta steril òf fértil, destruktivo òf konstruktivo, insistente òf trankil. Lo dependé di kon e ta hasié, di e klase di persona ku e ta. Si un persona tin un mundu interior sano i bon kultivá, e diálogo akí lo ta kla, pasobra e ta proporshoná lus pa interpretá e realidat i e lo ta motibu di konsiderashonnan masha balioso. Si por lo kontrali un persona, ta poseé un mundu interior skur i pober, e diálogo ku e lo hiba ku su mes, hopi be lo kombèrtí, den un ripitishon insistente di problema, ku ta referí na insidentenan perturbador di bida diario: den e kasonan asina, manera Miguel Ángel Martí a skirbi, e mundu interior ta laga di ta un laboratorio kaminda ta integrá datonan ku ta yega n’e , i ta bira un disko rayá ku ta ripití di forma insistente loke ku mas intensidat a raspa nos afekto últimamente.

E relashon di kada hende ku su mes lo mehorá segun ritmo di e grado di madures alkansá pa kada persona. E balorashonnan ku un persona madurá ta hasi –tantu riba su propio realidat komo riba esun straño– ta kustumbrá di ta balorashonnan realista, pasobra el a siña pa no kai fásilmente den e idealnan ingenuo ku despues, ora nan no realisá, ta produsí desepshon. E hende madurá sa di no dramatisá dilanti opstákulonan ku e ta topa kuné ora e ta ehekutá kualke di e proyektonan ku e ta pone dilanti. Su diálogo interior ta kustumbrá di ta trankil i ophetivo, di manera ku ni e mes ni otronan ta presentá sorpresa ku kapasidat di konfundié. E ta mantené un relashon ku su mes ku ta di ritmo kordial i eksigente. Poko be e ta krea konflikto interior, pasobra e sa di resolvé su preokupashon buskando solushon adekuá. E tin konfiansa den su mes i, si algun be e kiboká, e no ta basha den otro ni pèrdè su ekilibrio interior.

Den hende no madurá, en kambio, e diálogo interior akí di kua nos ta papia ta kustumbrá na kambia den un fuente di problema: ora no balorá kos na midí hustu –pa e mes, pa otronan, pa hinter realidat ku ta rondon’é–ku frekuensia, su pensamentunan lo krea espektativanan falsu p’e, ku ora nan no resultá, ta provoká konflikto interior i difikultat den relashon ku otro.

Un persona madurá i ekilibrá tin tendensia di mira semper su propio bida i esun di otronan ku afekto. E ta opservá realidat kompleto ku ta rondon’é ku deseo di enrikesimentu interior, pasobra esun ku ta mira ku kariño semper ta deskubrí algu bon den opheto di su vishon. E hende ku ta ampliá i ta enrikesé su interior di e manera aki, ta ampliá i ta enrikesé su amor i su konosementu, e ta bira mas optimista, mas kontentu, mas humano, mas serka di e realidat, tantu di hende komo di situashon.

Alfonso Aguiló