E burdugunan Chavista a mata mas ku 10 studiante na Falcon

PUNTO FIJO. Na estado Falcon ku ta keda na algun desena di miya for di kosta di Aruba e burdugunan Chavista a mata mas ku 10 studiante kaba.
Den nan afan diabóliko pa proba un mentira monumental ku e kandidato sápatro Nicolas Maduro a gana elekshon, nan no ta pena pa mata hóben ku ta futuro dje pais.
Un dje hóbennan ku nan a mata ta Jheison (asina nan ta skirbi ‘Jason’) Javier Bracho Martínez (22) kende nan a mata ku un tiru den kabes na altura di El Limón riba e outopista Caracas – La Guaira.
Un otro hóben ku e burdugunan di Maduro i Diosdado Cabello a asesiná ta Olinger Montaño di 23 aña di edat kende tabata gana su pan di kada dia komo barbero.
Esei a haña tiru den lomba riba avenida El Valle.
Un otro hóben ku nan a identifiká komo ‘Yunior’ a haña su morto na man dje militarnan Chavista na Antímano.
Isaías Jacob Fuenmayor González apénas a kaba di kumpli 15 aña dia 13 di yüli último ora ela haña un tiru den garganta na momento ku bisiñanan dje bario tabata protesta riba kaya.
Pa kuriosidat ela pasa banda di un sede di PSUV ora e bala mortal a alkanse.
Direpente un chavista ku tabata guardaespalda di un eks gobernador a saka su arma i tiré mata.
Pa kolmo su mama ta sufri di epilepsia.
E hóben tabata di kuna humilde pero desente i awor e bisiñanan ta eksigí hustisia.