E Bela di Pasku

E ta e símbolo mas destaká di e Tempu Paskual.. E ta was ku ta produkto di abehanan. E ta e bela mas importante kua nan ta sende den e Vigilia Paskual komo símbolo di Kristu – Lus, i ku ta butá den un elegante kolumna o kandelaber dòrná.

E Bela di Pasku ta ya for di e promé siglonan un di e símbolonan mas ekspresivo di e Vigilia. Mei mei di skuridat (ta hasi hinter e selebrashon anochi i ta kuminsá ku e lusnan pagá), di un konfó promé prepará ta sende e Bela, ku tin un inskripshon den forma di krus, kompañá di e fecha di e aña i di e lèternan Alfa i Omega, e promé i e último di e álfabèt griego, pa indiká ku e Pasku di Señor Hesus, prinsipio i fin di tempu i di eternidat, ta alkansá nos ku forsa nobo den e aña konkreto ku nos ta biba. Den e Bela di Pasku ta hinka den e was sinku grano di sensha, simbolisando e sinku yaganan santu òf glorioso di Señor riba Krus.

Den e proseshon di entrada di e Vigilia ta kanta tres bia e  aklamashon na Kristu: “Lus di Kristu. Nos ta yama Dios danki”, miéntras progresivamente ta bai sendiendo e belanan di esnan presente i e lusnan di e Misa. Despues ta pone e Bela den e kolumna o kandelaber ku ta bai ser su sosten, i ta proklamá rònt di dje, despues di a sensi’é, e solèm Pregon Paskual.

Ademas di e simbolismo di lus, e Bela di Pasku tambe tin esun di ofrenda, plamando su Lus: “aseptá, Tata Santu, e sakrifisio di e vlam aki, ku Santu Iglesia ta ofresé Bo den e ofrenda solèm di e bela aki, obra di abehanan. Ya nos sa loke e anunsiá e kolumna di kandela, kimando den vlam bibu pa gloria di Dios… Mara lus di Kristu kende ta resusitá den gloria kita skuridat for di nos kurason i spiritu”.

E Bela di Pasku lo ta sendé den tur e selebrashonnan durante e shete simannan di e sinkuenta dianan di Pasku di resurekshon, banda di e ambón di Palabra, te ku e atardi di e djadumingu di Pentekòster. Unabes e tempu Paskual a konkluí, ta kumbiní ku e Bela di Pasku keda warda di forma digno kaminda ta batisá hende. E Tambe ta usa e Bela di Pasku durante boutismo i na entiero, kier men na prinsipio i na final di e bida temporal, pa simbolisá ku un kristian ta partisipá di e lus di Kristu a lo largu di hinter su kaminda riba tera, komo garantia di su inkorporashon definitivo na e Lus di bida eterno.