Internashonal
E bankero Brasileño Ilan Goldfajn a keda elegí komo presidente BID
SAO PAOLO – Ilan Goldfajn eks presidente di Banko Sentral di Brasil a keda elegí ayera komo e presidente nobo di BID ( Banco Interamericano de Desarrollo).
Ilan Goldfajn ta bira e promé Brasileño ku lo dirigí un institushon multinashonal importante asin’aki ku tin su base na Washington.
Banco Interamericano de Desarrollo ta un banko ku ta finansiá proyektonan di desaroyo den vários kontinente.
E otro kuater kandidatonan pa e kargo ku a kompetí kontra Ilan Goldfajn tabata Cecilia Todesca Bocco sekretaria di Relashonnan Ekonómiko Internashonal di Kansieria na Argentina, Gerardo Esquivel direktor di Banco Sentral di Mexico, Nicolás Eyzaguirre eks minister di Ekonomia Chileno i Gerard Johnson ehekutivo di BID.
E motibu dikon Ilan Goldfajn a keda elegí ta debí ku e tin muchu mas eksperensia komo bankero i tin hopi bon relashon ku mayoria di e lidernan di e 48 paisnan miembro di BID.
Den e kaso aki Ilan Goldfajn lo bai remplasá Mauricio Claver-Carone ku lo baha dia 19 di desèmber próksimo komo presidente di BID.