Durante Gay Parade na Fort Lauderdale: Shofùr di un pickup aksidentalmente a manda su vehíkulo riba partisipantenan

FORT LAUDERDALE – Wilton Manors ta un zona serka di Fort Lauderdale i ku ta konosí komo un lokalidat kaminda e komunidat di LGBTQ sa tene nan Gay Parade por lo ménos dos pa tres biaha pa aña.
Djasabra último tabata dia ku e organisashon di LGBTQ a tene nan Gay Parade na Wilton Manors i ku segun Ali Adamson hefe di polis na Fort Lauderdale tabatin tur pèrmit regla.
Ali Adamson a splika ku e Gay Parade mester a kuminsá 7’or i un minüt despues un partisipante ku tabatin desabilidat pa kana den e parada a disidí na bai den su pickup.
Algu a bai robes ku e shofùr aki ku enbes di primi e pedal di brek a primi riba gas i a ranka bai duru riba e multitut ku tabata pará su dilanti.
Konsekuensha di lokual a pasa aki ta ku e pickup trapa dos partisipante.
Pa suerte tabatin agentenan di polis presente ku tabata por a duna promé asistensia na e dos víktimanan di kual unu a fayesé i e otro si a logra sobrebibí i ku por a transporte pa hospital.
Pa lokual ta e shofùr a keda detené pa outoridatnan lokal pa mas investigashon.
Justin Knight presidente di LGBTQ a kalifiká e insidente komo un aksidente lamentabel i ku no por konsiderá lokual a pasa komo un akto di terorismo kontra nan organisashon.