Dr. José Gregorio Hernández a bira Beato

Fin di april, Fundacion Venerable José Gregorio Hernández, tabatin tres dia di oracion, canto, alabansa y riba e ultimo dia tabata tin ofrecemento di bela como muestra di gradicimento na nos Tata Celestial.

Asina diasabra dia 1 di mei a sigui un misa solem presidi pa Vicario Pastoor Andres,  acompaña pa Pastoor Wuilder, Pastoor Andry, reverendo Theo y dos laico. Ora di ofrenda, un hobensito  di Venezuela bisti mescos cu Beato José Gregorio Hernández a haci ofrenda di flor na nomber di tur presente.

Nos Vicario a expresa su mes masha bunita, na un forma p’e pueblo comprende, cu nos mester haci obra y biba un bida mas dedica na Dios, siguiendo doctor su ehempel. No ta pa nada pueblo Latino Americano tabata yam’e ‘dokter di pobernan”.

Ta cu hopi amor y dedicacion, e tabata atende e pobernan den su tempo. El a haya accidente y fayece eherciendo su profesion vocacional.

Y manera  Monseigneur Baltazar na Caracas a bisa, cu Dr José Gregorio Hernández  a wordo beatifica n’e mihor momento, cu ta durante un pandemia.

Hopi persona ta pidi pa ayudo di intercesion pa nan salud dor di Beato José Gregorio Hernández. Sitio di Oracion cu esaki ta participa cu ta habri tur dia di 7:00 am pa 7:00 pm. Tambe t’asina cu tur diarazon anochi tin oracion of Santa Misa pa 7:00 pm.

Nos fundacion ta pidi pueblo di Aruba pa ban sigui resa, pa pronto nos Beato por wordo declara Santo.