Dos mion barí di petroli pa Bullenbaai

WILLEMSTAD – Ounke ku e direktor interino di Refineria di Kòrsou no a hasi menshon dje hecho ku ya tin dos mion di barí di petroli rumbo pa Kòrsou dia ela anunsiá reaktivashon di Bullenbaai, e ténker Ridgebury Astari ta nabegando rumbo pa Kòrsou ku dos mion barí di peroli den su tankinan.
Refineria di Kòrsou tin areglo ku Caribbean Petroleum Refinery pa almasená e petroli na Bullenbaai.
Nan a revela e notisia via nan portal marinetraffic.com anunsiando ku danki na e suministro aki por spera aktividat pronto na Bullenbaai.
Ne momentonan aki e tènker ta situa banda di West Afrika i lo tuma komo dos simkan pa yega Kòrsou despues di a sali for di Chennai, India dia 30 di mei. Siman pasá RdK a anunsia ku nan ta trahando diligentemente pa finalisá e negoshashon pa un alkiler a largo plaso di e tankinan ku ta permiti CPR pa almasená nan petroli ne terminal Bullenbaai. E akuerdo di almasenahe aparte dje kontrat a largo plaso pa maneho i operashon dje refineria i nan a negosha e akuerdo aki por separado. Den kuadro di e akuerdo aki CPS por almasená hasta 7 mion barí di petroli na Bullenbaai. Originalmente RdK indiká dia nan a kuminsa negosha ku e dos partidonan lo negosha e refineria i e terminal na Bullenbaai komo un pakete pero parse ku CPR ta kla pa kuminsa komersiá petroli usando e fasilidatnan na Bullenbaai ku petroli for di India siendo ku ainda no tin akuerdo riba maneho i operashon dje refineria. Originalmente gobiernu a bisa tambe ku e partido ku haña e terminal tin ku tuma e refineria. Fuentenan petrolero a splika ku e taktika aki ta un risiko pasobra kiko lo pasa si no yega na un akuerdo riba maneho dje refineria i no mester a separa nan dos for di otro.