Doño di tereno na Veeris kier a kobra Advent 2x pa mesun tereno

WILLEMSTAD. Dos siman pasá wes sivil a frena un intento di mala fe di un señora pa kobra Misa Adventista dos biaha pa e mesun tereno ku e misa a paga e señora un biaha kaba den pasado.
E señora mester a hole ku wes lo a changé den su chanchuyo pasobra dia wes a fiha fecha pa e papia personalmente ku e dos partidonan, representante dje misa só a presenta i e señora ku su apoderado legal a bati un apsent olimpiko i ya kaba einan a pèrde e kaso pa default.
Wes no a pèrdè tempu ku e señora i a sigi ku e kaso ku ta konsisti di un tereno na Veeris ku Advent ta usa i ta pegá ku tereno dje señora.
E señora a traha un kas i tras dje kas ela basha un fundeshi ku a kubri pida tereno dje señora.
Na aña 2010 e direkiva di Iglesia Adventista a firma un akuerdo ku e señora kaminda doño di e tereno na Veeris ta firma ku ela risibi Naf. 18.000.00 pe konstrukshonnan realisa riba e tereno i e fundeshi.
Mientras tantu Advent a traha un edifisio den kual nan a tene servisio religioso.
Asina 10 aña a pasa i e señora a hiba Iglesia Adventista korte pa splika ku no ta bende ela bende e tereno ku Advent sino a fia Advent e tereno pero wes a rechasá e agumento pasobra ta fia ela fia Advent e tereno ku e fundeshi i e edifisio.
Wes a bari e demanda dje señora for di mesa pero no por a dikta sentensia ainda pasobra ainda e periodo den kual e señora por apelá e kaso na Ulanda, no a pasa.
E señora ta eksigi Advent pa bandona e tereno denter di 4 siman so pena di pago di un multa di 500 florin pa dia i si Advent no bandona e tereno, manda polis bin saka nan.
E abogado di Advent a gana e kaso masha fasil pasobra e señora a entama e mesun kaaso pa di dos biaha pero ku un otro abogado i esei ta abusu di derecho prosesal. Si atende e kaso esei lo a nifika ku wes lo mester a atende e mesun kaso dos biaha pero ora wes a yama e partidonan pa di dos biaha, e no a haña oportundiat pa interoga nan.
Di manera ku e señora a perde e kaso i mester a paga e gastunan dje kaso i 2500 florin ne abogado di Advent.