Donjonan di Pòmp no tin konfiansa mas den reguladó di preis

WILLEMSTAD. Pòmphouders a reakshona fuertemente kontra politiko i parlamentarionan i Curoil riba e posibilidat pa baha márgen di ganashi riba kombustibel na benefisio di pueblo.
Pa basta dia kaba pomphouders a bin ta tuma nota di atakenan riba nan sektor for di representantenan i
instansianan di gobièrnu kaminda ta trese dilanti ku lo mester bin kompetensia entre pòmphouder dor di baha e márgen di pomphouders.
E pomphouders a reakshona fuertemen kontra politikonan ku sin informá nan mes mihó, ta lansa nan gritunan populista.
E ta parse mané e polítikonan aki ta laga nan mes wòrdu manipulá i wòrdu malinformá dor di persona na kòl ku dashi ku tin agèndanan diferente ku no tin bienestar di pòmphouders sin ta konsiente ku pueblo ta konsistí tambe di komersiantenan inkluyendo pòmphouders i nan 750 empleadonan.
E promé ola di Covid-19 i seguidamente e guera na Ukrania afekta pomphouders fuertemente.
Ta ampliamente konosí ku e ganashi riba liter di gasolin ta Nafl. 0.1753 i Buro Post en Telecommunicatie ta fiha esaki.
Pòmphouders no ta bai dilanti na momentu di subida di preis di kombustibel.
Alkontrario, pòmphouders ta bai atrás i ora e preis di kombustibel subi paso ménos ta bende menos liter pero gastunan operashonal si a subi.
Pòmphouders mester saka òf fia mas kapital pa por kumpra kombustibel i esun ku ta bai dilanti na entrada ta gobièrnu dor di e diferente schakel di OB ku ta un %.
Mas haltu e preis, mas entrada pa gobièrnu i NO pa pòmphouders, ni pa CUROIL.
Ya pa algun aña e margen pa por operá un pompstashon responsabelmente ta bou di preshon, pa motibu ku e reguladó BTP ku ta kalkulá e márgen di e pòmphouder, no ta rekonosé i adapta e gastunan operashonal.
For di 2018 e sektor ta den fuerte diskushon ku BTP den kual ta mustra BTP ku e proseso pa yega na e márgen no ta transparente ni ophetivo. A a bin ta splika i mustra na varios okashon ku e márgen den e sektor di pompstashon NO ta sufisiente pa kubri e gastunan operashonal.
Pòmphouders a laga hasi un investigashon dor di un Profesor renombrá kual a mustra klaramente ku e proseso di kalkulashon di márgen no ta hustu ni transparente.
Nunka BTP a duna un reakshon riba kontenido di e rapòrt aki.
Pa e motibu aki últimamente pòmphouders a pidi BTP pa laga un instansia òf
komishon profeshonal i imparsial hasi un investigashon den e proseso pa kalkulashon di e márgen.
BTP a keda ignorá e petishon di pòmphouders.
Mirando e aktitut aki di e reguladó, dos siman pasá, pòmphouders a manda un karta pa Minister Cijntje den kual pòmphouders a indiká e rasonnan pa kiko nan no tin konfiansa mas den BTP i ta pidi Minister Cijntje su intervenshon pa apuntá un organisashon òf profeshonalnan imparsial pa hasi un investigashon den e proseso di kalkulashon di márgen pa pòmphouders.