‘Doming’i Pleizí’ ta krusa brùg

WILLEMSTAD – Despues di tabata aktivo sagradamente pa mas ku tres dékada na e emisoranan Z86 i Mi95 di Curom, entrante yanüari 2023 Percy Pinedo ta move ku su programa dibertido i informativo ‘Doming’i Pleizí’ pa Radio Hoyer 1. Ke men, e ta muda di Otrobanda pa Punda.
Komo freelancer durante 34 aña Percy Pinedo a presentá diferente sorto di programa na e emisoranan di Curom, sea enkuanto farándula, karnaval, digitalisashon, deporte, den tempu di elekshon, i tambe mas general. Kuminsando otro luna Percy Pinedo ta bolbe presentá na Radio Hoyer 1 kaminda el a kuminsá su karera di radio na 1979.
Den e aña nobo e lo presentá Doming’i Pleizí tur djadumingu entre 8 or i 12 or na E Solo di Pueblo, 101.9 riba bo dial di FM. Aya e lo sigui su tradishon di dediká tempu i espasio na músika nobo di nos mes artistanan, pero tambe piesanan di antaño, produkshonnan musikal nobo for di eksterior, un skina spesial pa ‘gospel’ i de bes en kuando entrevista ku wéspet ku ta divulgá nan smak musikal tambe.

Percy Pinedo no ta keda sin bai ku su kompañero Eddy Sloop, mihó konosí serka e públiko grandi di oyente ei’fó pa su nòmber artístiko ‘Sleutel”, ya nan dos por sigui komentá tur sorto di aspekto di deporte, farándula i otro tópiko ku subi mesa. Na Radio Hoyer e programa aki lo tin e mesun ingredientenan manera Doming’i Pleizí a bira konosí p’e durante e añanan tras di lomba, i kaminda de bes en kuando mamamentu di gai no por faya.