Doctor venezolano José Gregorio Hernández lo ser beatifiká djabièrnè awor 30 de aprel na Caracas

Konosí komo e “médiko di esnan pober”, e ta konsiderá un santu den Venezuela i otro paisnan latinoamerikano pa atendé esnan mas pober. Tambe e ta rekonosé pa su aportenan na medisina den su pais.

E médiko venezolano José Gregorio Hernández, ku a fayesé na 1919 i ta mashá venerá den Venezuela, lo ser beatifiká djabièrnè próksimo 30 di aprel na Caracas, e Konferensia Episkopal Venezolano (CEV) a anunsiá djarason 24 di mart 2021.

Dia di selebrashon litúrgiko di José Gregorio lo ta 26 di òktober di kada aña

E beatifikashon “ta yega den un momento partikularmente oportuno”, monseñor Baltazar Porras a bisa den e konferensia di prensa, den alushon na e pandemia di coronavirus, ku den e pais a laga mas di 1.500 morto den e último 53 simannan.  “No tin mihó bálsamo ku di rekurí na  interseshon di e médiko di pobernan”, el a ekspresá.

Kardinal Pietro Parolín, sekretario di Estado di Vatikano i antiguo nunsio apostóliko den Venezuela, lo presidí e seremonia di beatifikashon. Ademas, 26 di òktober, fecha di nasementu di e médiko, ta keda establesé komo su dia di selebrashon denter di e religion katóliko.

Aktonan den henter Venezuela

Porras a splika ku lo selebrá ofisionan religioso den tur region di Venezuela iy kada diósesis di e pais lo risibí un relikia di e beato nobo, miéntras ta prepará otro selebrashon, ainda sin fecha definí, ku lo tuma lugá den e poblashon andino di Isnotú, estado Trujillo, kaminda Hernández a nase den siglo XIX.

Lo realisá e beatifikashon den e Stadion Universitario di e Universidat Sentral di Venezuela, kas di estudio den kua Hernández “a gradua, tabata profesor, investigador i inovador di medisina den Venezuela”, Porras a destaká.

E beatifikashon a ser aprobá 19 di yüni 2020, despues di ku un komishon teológiko di ekspertonan a konkluí ku un milager di Hernández a salba bida di un mucha muhé di 10 aña, gravemente herida durante un asalto na mart  2017.