Djabièrnè awor ta apertura: Sòftbòl dediká na: Asila i Isonette….

Djabièrnè awor 12 di ougùstùs ta start ku e temporada di sòftbòl femenino fastpitch organisá pa Federashon di Sòftbòl di Kòrsou.
E kampeonato ta start den parke Sam Buntin na Brievengat.
E apertura ofisial lo ta 7or di anochi.
E temporada nobo lo ta dediká na dos eks estrea di sòftbòl femenino ku ta Asila Finies i Isonette Polonius. Tantu Asila, komo Isonette a hunga sòftbòl na nivel hopi haltu i ambos pa hopi aña a defendé nos bandera den selekshonnan di sòftbòl di Antia Hulandes.

Asila a hunga prinsipalmente den outfield, i Isonette tabata un hungadó di utilidat. Ambos tabata karga un bate sumamente peligroso den nan tempu.

Sin duda un bon desishon di CSB di a kòrda riba Asila i Isonette.
E wega inougural dje temporada nobo lo start 8or di anochi i lo bai entre Pichingolo Nissan/Kia ku ta kampeon di temporada pasá i e tim Benjamin ku ta Treasure.

Tur amante di sòftbòl ta kordialmente invitá pa ta presente djabièrnè awor na parke Sam Buntin pa inisio di temporada di sòftbòl femenino fastpitch 2022.