Discover Travel LLC for di Merka ta entregá material pa skol na Johan Maurits School

WILLEMSTAD- – E representantenan di e grupo di biahe Discover Travel LLC tambe konosí komo DiscoverGidi ta organisá trepnan di biahe pa bishitá paisnan rònt mundu.

Nan meta ta pa no solamente laga e grupo di biahero gosa i eksperensiá e kultura di e pais pero pa tambe duna bèk na e destinashon den forma di nan tempu i dor di hasi donashon.

Na mes momentu nan ta mira esaki tambe komo un manera pa yama danki pa e hospitalidat risibí na e destinashon.

Resientemente e grupo tabata di bishita na Kòrsou i ku asistensia di Ofisina di Turismo di Kòrsou (CTB) i Curaçao Cares Foundation, e grupo a hasi donashon di material pa skol na alumnonan di Johan Maurits School.

DiscoverGidi su pensamentu ta, ku “muchanan ta nos futuro” pa e motibu aki e eskoho a kai riba un skol.

E maestronan a ekspresá nan gratitut pa e materialnan risibí i a indiká ku e muchanan lo bai hasi bon uso di esakinan.

E materialnan ku a keda repartí na e skol a keda kolektá serka e biaheronan den e grupo i serka personanan ku ta sostené DiscoverGidi.

CTB ta agradesido ku e grupo a skohe Kòrsou komo nan destinashon pa vakashon i pa e donashon ku nan a hasi na Johan Maurits School.