Direktor ulandes di SLM a hui for Surnam

PARAMARIBO – E direktor di Surinaamse Luchtvaart Maatschappij (SLM), Paul de Haan a hui siman pasá djamars ku su kasá i dos yu for di Surnam via di Guyana franses bordo di un buelo di Air France pa Paris.
Reportadamente De Haan a hui apesar ku gobiernu a emiti un dekreto ku ta prohibi e direktor pa bandoná e pais ku su famia.
Den fin di siman medionan informativo na Surnam a revelá informashon devastador riba e ulandes ku nan a kontrata pa saka pia dje kompania for di lodo pero kende ta resultando mas metí den korupshon te ku a sugeri pa duné un estatua pe forma kon rápido el asimilá den e mundu di korupshon di Surnam.
E korant surinameño Waterkant a informa ku ta for di djaluna hasi ocho dia ela manda su shofur bai su ofisina pa piki su kosnan personal.
Outoridatnan dje pais tabatin informashon ku De Haan e hurista Prenobe Bissessur i presidente dje hunta di komisario Xaviera Jessurun tabatin plan pa bandoná e pais.
Outoridatnan a detené Bissessur na aeropuerto di Surnam
De Haan i Prenobe Bissessur a haña òrdu pa no sali for di e pais en relashon ku e investigashon penal di Ministerio Publiko riba e maneho korupto na SLM.
Nan lo a konstatá iregularidat pero no a duna detaye.
E fuga di De Haan ta kulminashon di un seri di problema den e kompania ku miembronan dje aktual koalishon a chika finansieramente pa mata.
SLM ta den problema finansiero grandi, e monton di debe ta krese pa dia i gobiernu ta sigi pòmp plaka den e kompania ku pa kolmo no ta bulando pasahero.
E kompanianan strañero ku tabata alkilá avion ku SLM a saka nan avionnan i aktualmente ta e kompania Airhub ta bula entre Amsterdam i Paramaribo.