Internashonal
Direktor di akademia di polis na Haiti a keda asesiná
PORT AU PRINCE – Segun fuentenan polisial den fin di siman ku a kaba di pasa tabatin un insidente ku a konmové departamento di polis na Haiti.
Den e kaso aki lokual a pasa ta ku direktor di Akademia di Polis identifiká komo Rigaud Harington a keda asesiná na momentu ku e tabata yegando su kas na Petion-ville.
Lokual tin na informashon ta ku Rigaud Harington tabata koriendo riba e karetera ku yama Freres aserkando su kas na e bario di Petion-ville kaminda dos vehíkulo a blòkia su patruya i shete hòmber a baha arma i seft’é ku bala sin ku e tabata por a hasi nada.
E asesinato di Rigaud Harington ta tuma luga nèt na momentu ku Haiti ta den un deterioro sin presedente di inseguridat debí na un gera entre gengnan ku ta mihó arma ku polis.
Tin informashon ku entre yanüari pa novèmber un total di 17 agente polisial a muri den kombate kontra gengnan ku ta bastante violento na Haiti.