Dios tuma kontrol, ta mensahe di e kantika “CUIDARAS DE MI” lansa dor di Shamiro

Willemstad – Dios tuma kontrol i kuida nos ta e mensahe di e kantika “Cuidaras de Mi” ku Shamiro Anita a kaba lansa huntu ku su videoclip nobo.
Despues di su kantikanan manera “Move Tur Montaña”, “Un Brasa So Mi Ke” i “Kalma E Tormenta” awor Shamiro Anita ta lansa e kantika aki pa yuda i stimula tur hende ku tin miedu, ta duda of no sa kon pa logra pasa den e momentunan difisil, tristu i insigur aki, foral dor di e pandemia di covid.
E kantika “Cuidaras de Mi” ta konta e historia di un hende muhe ku a perde kontrol di su auto mientras e tabata bayendo kas i a pidi Jesus pa literalmente i figurativamente “stür” su bida i tuma e stürwil for di su man, paso su mes no tabata por mas.
Ta trata di e kantika inspirativo original na ingles titula “Jesus Take Control” di e kantante Carrie Underwood di musika Christian-Country ku a ser tradusi i kanta na Spaño dor di Shamiro den su estilo uniko ku su tremendo bos i un melodia estilo Classical Pop/Opera.
Letranan di e kantika “Cuidaras de Mi” ta bisa “Tu cuidas de mi, toma tu el control. Solo yo no puedo vencer. Dame de tu amor, sálvame, que soy un viajero ya sin luz. Cuidarás de mi”.
E videoclip “Cuidaras de Mi” aki ya kaba tin mas ku 84.000 views riba Youtube i 12.000 streams riba Spotify. Por wak e tremendo videoclip aki riba youtube link: https://youtu.be/PO_4HXRBBjs of buskando “Shamiro Cuidaras de Mi”. Tambe por solisitá e kantika aki na bo radio emisora preferi na Korsòu, Aruba, Bonaire i Hulanda.
Ku e videoclip nobo aki Shamiro ke motiva I rekorda nos ku ora bida pone nos hansha, rabia, desmotiva, kunsumi, spanta, bira tristu, kai den depreshon of sinti nos insigur, semper nos por hasi orashon i pidi Dios pa tuma e kontrol i kuida nos. Shamiro su orashon ta pa Dios kuida nos.