E gran mayoria siudadano di e isla aki ke laga parse ku e problema mas grandi di e komunidat kurasoleño ta falta di plaka. Kontinuamente ta opservá ku no tin plaka pa gobernashon di kalidat i di nivel riba e teritorio aki, loke segun nan ta e kousantenan di pobresa, mizeria, deterioro sosial etcetera, pues pa falta di plaka. Pero en realidat nos problemanan ta mas serio i pa gran parti e problemanan tin di haber ku nos estado mental korumpí. Konstantemente ta manda riba e pueblo aki notisia i informenan sumamente negativo ku tin un efekto devastador riba e totalidat. Ta yena miembronan di e komunidat aki solamente ku notisianan teribel di konflikto, atrakonan armá i aksidentenan teribel. Enfin, un ola di maldat ta plama den e komunidat aki di manera ku no tin nada di pensa riba dje sino ta puru sufrimentu, angustia i frakaso. Nos tur ta bib’é i huntu nos ta sufri. Ta di índole mental gran mayoria di nos problemanan ta di manera ku kasi no ta posibel skohe un direkshon di desaroyo saludabel, pasobra nos ta keda tené rehen den konstante krímen i kriminalidat. Algun siman pasá mi a tuma nota di ekspreshonnan di algun hóben kendenan a tuma e kurashi pa mustra ku tur esaki ta danki na un kultura di polítika sumamente agresivo i violento, samsam ku gobernashon i periodismo di mesun estilo fatalista i demotivante. Di otro banda mundu kompletu ta papiando i ta diskutí ku tur seriedat riba e konsekuensianan di Covid 19 i esfuersonan kontinuo ta keda hasí pa pueblonan di mundu sali rekuperá for di e efektonan di Covid 19. Si Kòrsou no ke keda atras, si nos no ke ta un pueblo ku ta bai sukumbí pa inhustisia sosial, pobresa i krímen, nos mester pone mannan na obra awó, awó! Mester analisá kiko ta pasando ku e komunidat di Kòrsou, pa sa na unda nos problemanan mayor ta sinta, anto di kua manera por resolvé nan. E tema ku e hóbennan aki a trese padilanti, esta e sistema di indoktriná nos hendenan ku maldat, enbèrdat ta un faktor ku mester tuma na serio. Kòrsou mester kue e toro tene na su kachu, sòru pa polítika, gobernashon i periodismo no sigui hasi mas daño. Rabia, odio i desgustu no mester keda fomentá den kurason di nos hendenan, pasobra al final e efektonan ta teribel. Boso ta kòrda kon sekuestro di hende na sierto momento a lanta kabes den Kòrsou? Kon maltrato di hende grandi a bin ta tuma lugá ku frekuensia, likidashonnan teribel entre gèngnan kriminal? Tantu pa loke ta trata polítika, gobernashon komo periodismo énfasis mester ta konsentrá riba edukashon, formashon i emansipashon di nos pueblo pa kontribuí na elevashon spiritual i mental di e komunidat di Kòrsou. E transformashon tan nesesario i ku rápidamente mester tuma lugá den Kòrsou, no ta nada fásil, pasobra muchu tempu a laga kosnan sali kompletamente for di man, hasiendo mal uzo di nesesidat, emoshon i falta di konosementu di nos hendenan. Den nos komunidat lamentablemente tin forsanan malisioso ku a tuma over i si nos no sera kabes huntu, krímen teribel lo bin dominá den poko tempu. Mester dobla nos rudianan pidi Dios Tata Todopoderoso forsa i sabiduria pa salba polítika, gobernashon i periodismo di Kòrsou. No laga nos sigui bai mas patras, sino laga sentido di hustisia, amor i rèspèt prevalesé. Netamente hasiendo uzo di e krísis Covid 19 tin tur oportunidat pa pone kosnan na òrdu i sòru pa Kòrsou por sigui un ruta sano ku ta e fuente di felisidat i prosperidat di su hendenan.
