Dios ta stima mi?

Si, Dios ta stima bo. Dios ta e Kreador di e mundu aki. El a krea e mundu aki p’asina lo tin hende ku por sostené un relashon kun’E. I un di e hendenan ku E tabatin den pensamentu na momentu ku El a krea mundu, ta abo. Den Isaias 46:10 nos ta lesa ku Dios ta deklará: “Fo’i kuminsamentu ya mi ta anunsiá e fin. Mi ta predisí hopi delantá kosnan ku no a pasa ainda. T’Ami t’Esun ku ta bisa: ‘Mi desishon ta irevokabel; mi boluntat ta lei.’

E konosé e kosnan, i mas ainda hendenan, ku lo eksistí den kada generashon. Bo no ta un kasualidat. Bo a keda planeá dor di Dios. Adam, e promé hende, ta keda yamá ‘yu di Dios’ (lesa Lukas 3:38) Tur hende ta ‘Dios su desendientenan’ (lesa Echonan 17:28) Pesei tur hende den sierto sentido ta yunan di Dios. Dios ta stima tur su yunan i ta deseá tur kos bon pa nan. Esei ta konta pa bo tambe.

Dios su amor pa tur hende.
Riba hopi lugá den e Palabra di Dios ta keda kontá na nos, ku Dios stima hende. E versíkulo mas famá ta bisa: “Pasobra Dios a stima mundu asina tantu ku El a duna su úniko Yu, pa tur esnan ku pone konfiansa den djE no bai pèrdí, ma haña bida eterno.(Huan 3:16) Esaki ta papia tokante Dios su amor, no solamente pa bon hende òf hendenan spesial, pero pa tur hende. Un otro versíkulo ta enfatisá ku e amor di Dios no ta dependé di lokual nos ta hasi: “Dios sí ta demostrá su amor pa nos dor ku Kristu a muri pa nos miéntras nos tabata pekador ainda. (Romanonan 5:8)

Dios su amor pa hendenan individual
Esaki ta versíkulonan ku ta enkurashá hopi, pero nan ta papia den sentido general. Si Dios stima ‘mundu’ òf ‘pekadornan’ E ta stima ami tambe personalmente?E konosé mi, E ta mirá mi, E ta sinti algu partikular p’ami? Beibel ta mustra ku e amor di Dios ta unu mashá personal. Ora ku bo a keda formá den seno di bo mama, Dios tabata presente. (Lesa Salmo 139:12-16).

E prueba mas kla di e amor di Dios pa kada hende individual, ta e tantísimo orashonnan ku a keda skuchá ku nos ta topa den Beibel. Algun ehèmpel: Dios a skucha orashon di Gideon kaminda e ta pidi pa un señal pa sa si Dios a yam’é.( lesa Huesnan 6:36-40) Dios a skucha Hana su orashon pa un yu (lesa 1 Samuel 1:10-20). El a skucha Elías su orashon pa laga rosea di bida bolbe den e mucha. (lesa 1 Reinan 17:22). Dios a skucha orashon di Ezekías pa sanashon (2 Reinan 20:1-11) I El a skucha orashon di Iglesia pa Pedro su libertat for di prizon (Echonan 12:5-17) Bo por ta sigur ku Dios ta interesá den bo, na mes manera ku E tabata interesá den kaso di tur e hendenan aki for di Beibel.

Pero tin un otro banda tambe. Dios su kuido ta pa tur hende: “Pasobra E ta laga su solo sali tantu riba mal hende komo riba bon hende” (Mateo 5:45) Sinembargo no ta sufisiente pa ta Dios su desendiente den sentido ku El a krea nos, pa ta salbá. Hesus tabata stima un hòmber hóben ku a bin bishit’é (Marko 10:21). Tòg e hòmber a bandoná Hesus, I no tin ningun indikashon ku un dia El a keda salbá. Dios su amor ta keda ofresé na bo. El a duna su yu p’asina tur ku kere den djE lo no bai pèrdí, pero ku lo tin bida eterno. I esei ta konta pa bo tambe. Pero ketu bai bo por bai pèrdí si bo no kere. Pues e pregunta no ta : Dios stimá bo? E pregunta ta: abo ta stima Dios?

Solamente si bo tambe stima Dios, bo lo eksperensiá Dios su amor pa bo. Na momentu ku bo pone un èmber den áwaseru, pero e èmber ta kabes abou, e no ta keda yená. Na mesun manera Dios ta dispuesto pa drama su amor riba bo, pero bo mester ta kla pa risibí esaki. I e milager mas grandi ta: Dios mes ta prepará nos pa risibié. E ta pone e hèmber para règt, E ta basha Su amor den nos kurason. (Romanonan 5:5) Bo ta anhelá esei? Sí, Dios ta stimabo. I abo, bo ta stim’É?