Dimitri Leon: Indiskutibelmente e mihó hungadó di Pinpòn na Kòrsou

WILLEMSTAD – Djamars anochi ultimo ku e torneo Top 6 pe aña 2022 Dimitri Leon a demonstrá ku no ta pornada e ta wòrdu konsiderá un legendario den e mundo di tènis di mesa na Kòrsou.
E la kaba empata ultimamente e rekòrt di Robert Hose pa mas titulo di Kòrsou maskulino ku ta diez (10). Djamars anochi e la mustra ku esey ta e klase di hungadó ku e ta.
Na e momentu aki sin duda den nos islanan antiyano ta na Aruba so tin hungadó ku por duna Dimitri realmente hopi bataya, aunke esun ku e tin realmente problema ku ne ta Mario Lobo, legendario di Aruba ku mas ku 25 titulo riba su nòmber.
Pa loke ta e torneo Top 6 mes, mester bisa ku tremendo partidonan a wòrdu eksihibí, kaminda den un round robin system (tur kontra tur) Dimitri a sa di gana tur su partidonan plus e final kua ta tabata kontra Juan – Carlos Sanchez ku ya kaba e la gana den e rondo preliminar.
E la hunga 6 partido, gana tur 6, ganando 18 sèt (SG) i pèrde apenas 4 set (SP).
Asina ey e puestonan final a keda mesun kos ku e klasifikashon, ku Dimitri kampeon indiskutibel i Juan-Carlos Sanchez sup kampion.
Un tremendo anochi tras di un bon organisashon.
E torneo aki a plantiá e pensamentu pa otro aña organisá un top 8 di Antiyas aki na Kòrsou ku partisipashon di Aruba (2x), Bonaire (2x) i Kòrsou (4x), tur ku nan mihó hungadonan. Posibelmente den kuadro di selebraschon di Fundashon Sala Irene Moreno ku lo kumpli otro aña su di 8 lustro.
E torneo aki lo ta posibelmente despues di kampeonato nashonal ku lo ta den fin di Novèmber 2023.