Dikon resa Rosario?

Hopi ta esnan ku dor di a resa nan Rosario ku fe a logra optené un morto bon i santu i awor ta gosa den shelu pa semper
Outor: Santu Rosario

Bieunan ta konta ku ora Santo Domingo de Guzmán a kuminsá na desanimá ora el a mira ku den e sitionan kaminda e tabata prediká e hendenan no a kombertí i herehia no a alehá su mes, el a pidi Nos Señora pa ilumin’é ku algun remedio pa haña salbashon di e personanan ei i ku El a bis’é den un vishon: “E terenonan akí lo no produsí frutanan di kombershon si nan no risibí abundante áwaseru di orashon”.

For di e ora ei e santu a dediká su mes na laga e hendenan resa e Nos Tata i Ave Maria i rekomendá nan pa nan pensa riba e misterionan di e Bida, Pashon i Morto di Hesus. Pronto e kombershonnan tabata masha numeroso i hendenan di e regionnan a bolbe na e berdadero religion.

Awe, despues di Santa Misa, Rosario ta kisas e deboshon mas praktiká pa fielnan. Enemigunan di religion katóliko (protestantnan, etc.) a bisa i ta sigui bisando horornan kontra Santo Rosario pero katólikonan a eksperimentá i ta sigui eksperimentando dia pa dia fabornan divino ekstraordinario ku nan ta haña ku e santu deboshon akí.

Kuantu persona a logra mira nan mes liber di piká i mal kustumbernan na ora di dediká nan mes na resamentu di santu Rosario ku deboshon! Kuantu tin ku for di ora ku nan ta resando Rosario na la Bírgen Maria a nota kon nan bida a mehorá notoriamente den virtutnan i bon obranan! Mashá hopi ta esnan ku dor di a resa nan Rosario ku tur fe a logra optené un morto sano i bon i awor ta gosa den shelu pa semper.

Ohalá ku nos lo lesa algun buki ku ta papia di e maravianan ku bo ta haña ku resamentu di Santu Rosario. Basta na sa ku e Rosario a ser rekomendá pa hopi Sumo Pontífise i aprobá pa Iglesia Katóliko den henter mundu i ku esnan ku ta res’é ta haña numeroso indulgensia.

Ta yama indulgensia rebaho di kastigunan ku nos lo mester sufri den e otro bida pa nos pikánan. Iglesia Katóliko ku e poder ku Hesus a dun’é ora El a bisa: “Tur loke bo permití na tera, lo ta permití den shelu tambe”, por konsedé na fielnan, ku pa sierto deboshonnan, rebaho di parti di e kastigunan ku nan lo mester a sufri den purgatorio.

”Ta konsedé un indulgensia plenario si ta resa e rosario den un iglesia òf un kas di orashon públiko òf den famia, den un komunidat religioso òf asosiashon piadoso; ta otorgá un indulgensia parsial den otro sirkunstansianan” (Enchiridion de Indulgencias, p. 67)

Kondishonnan:
1. Ku ta resa e sinku desena di e Rosario sin interupshon
2. Orashonnan mester ta resitá i misterionan meditá
3. Si e Rosario ta públiko, mester anunsiá e Misterionan

Ademas mester kumpli ku:
1. Konfeshon Sakramental
2. Komunion Eukarístiko
3. Orashonnan pa e intenshonnan di Papa

Si no ta kumpli ku e kondishonnan pa e indulgensia plenario, ainda por gana indulgensia parsial.

Por apliká e indulgensia na difuntunan. Por gana e indulgensia plenario únikamente un be pa dia (eksepto den peliger di morto).

”Lo maravioso di Santu Rosario no ta ripitishon di e avemarianan òf di e mesa bon drechá ku ta sostené e imágen di la Bírgen, sino e eksperensia di e unidat ku ta konformá den henter mundu pa alabá i bendishoná Dios pa e motibunan inmenso di su amor pa ku humanidat. E ta un kustumber riku di piedat popular kaminda Santísima Bírgen ta bira universal i di hopi importansia pa e kreyentenan. E ta e oportunidat magnífiko ku nos tur mester eksperimentá den fe e amor akí na Dios den Maria Santísima, ku kua El a konfia e mishon di salbashon akí. Santu rosario ta e lugá pa rekonosé Maria Bírgen komo Mama di Señor Hesus i riba e nivel di e grasia, Mama di nos tur. E ta alabes e rekonosementu di ku Dios atraves di djE ta intervení na nos fabor.