Dikon nos orashonnan mester ta kòrtiku?

San Benito ta splika esaki

Philip Kosloski
San Benito ta bisa ku, riba tur kos, nos orashonnan mester ta outéntiko
Den siglo VI, san Benito, e pader di e bida monástiko oksidental, a formulá un regla espesífiko pa su monhenan. Den e dokumento, el a konsehá e religiosonan pa hasi orashonnan kòrtiku:
“Orashon, por lo tantu, mester ta kòrtiku i puru, a ménos ku ta prolong’é bou di e inspirashon di e grasia divino. Den e komunidat, sin embargo, orashon semper mester ta kòrtiku; i ora el superior ta duna e señal, tur hende mester lanta para huntu.”
Esaki no ta nifiká ku monhenan lo no mester a resa durante periodonan largu di tempu.
Segun komentario di un benediktino:
“Despues di hasi un orashon, un persona ta resa den su kurason i esaki ta konsiderá ‘orashon’. Di e mesun moda, den algun tradishon primitivo, despues di kada Salmo tabatin un periodo kòrtiku pa e gritu spontáneo ei di e kurason na Señor. Esaki ta e orashon ku mester mantené: kòrtiku i puru – i no prolongá. E intentonan pa prolongá e orashon akí ta, generalmente, únikamente hasi esena, no e realidat«.

Puresa de kurason
San Benito tabata ke pa su monhenan lo a resa ku nan kurason, no pa yama atenshon di otronan.
Manera el a skirbi den e mesun Regla, «nos mester sa ku Dios ta konsiderá nos puresa di kurason i lágrimanan di doló, no nos hopi palabranan».
Den e sentido akí, no ta apliká e Regla di san Benito únikamente na orashonnan hasí den públiko, sino tambe na nos orashonnan partikular, bisá den komodidat di nos propio kas. No mester enfoká orashon den durashon, sino den e kurason.
Dios ke skucha orashonnan ku ta bini di lo mas profundo di nos kurason. Ora nos ta hasi esaki, nos ta invit’é pa drenta den nos bida i nos ta permitié sondia nos heridanan mas profundo.
E ta e «Médiko Divino» i por kura nos ta abri nos kurason na djE.
Por lo tantu, laga nos ban tuma e konseho di san Benito i sentrá nos orashon den outentisidat i no den e kantidat di palabra.