Dikon ami no ta kapas pa pordoná?

Carlos Padilla Esteban

No tin nada ku ta sufisiente pa duna pordon. Ni e arepentimentu di esun kulpabel. Ni su kastigu òf kondena. Nada ta sufisiente
Ta kla p’ami ku pordon ta algu mashá difísil. Den nòmber di Hesukristu mi ta pordoná tantu be. E ta Esun ku ta hasié, no ami. Ami únikamente ta pone bos na su palabranan i den mi man mi ta alsa su gesto.
Ami ta duna un pordon ku no ta di mi, ami ta demasiado chikí i pordon ta superá mis forsanan. Mi ta pordoná faltanan i pikánan, ku un fasilidat úniko. Ta Dios ta Esun ku ta pordoná i ami únikamente ta obedesé.
Pero despues, ora un persona ta heridá mi i ta hasi mi daño, ora renkor ta biba den mi alma, impotensia ta apoderá di mi. Mi no por hasié, mi no ta kapas pa apsolbé ningun hende den mi propio nòmber. Mi no ta logra pordoná lubidando e renkor ku ta hasi mi tantu daño.
Un persona a hasi mi daño, na ami òf na otronan ku mi ta apresiá i ta atmirá. I ami ta herebé di paden. I e deseo di pordon no ta surgi den mi, e ta mas bien e deseo di vengansa.
Kon mi por pordoná di kurason un hende ku a hasi mi daño? E herida ta habrí. E odio ku a brota un dia no ta ta baha ku tempu. Nan ta bisa mi ku si mi pordoná mi ta liberá mi mes i si mi no pordoná mi ta sigui na kadena di esun ku a hasi mi daño.
Ta bèrdat, mi no ta ninga esaki. Pero e kadena di renkor ta demasiado diki. I loke keda grabá den e kurason no ta fásil pa kita. No tin niun hende ku ta lubidá esaki, ami no por.
Otro dia mi a lesa: «Pordon’é loke el a hasi bo tantu daño manera pa ku bo lo reakshoná di e forma aki i hasi loke bo sa na hasi p’asina ku e ta pordoná bo . No laga nada stroba bo. Únikamente e kosnan aki ta bale la pena, sobra no ta bal nada».
Pordoná i ser pordoná. E ta parse asina simpel pero tur esaki ta e klave riba kua bida di hende ta basá. Un oriya, esun di renkor i esun di rekuerdo yen di doló. E otro oriya, esun di pas ku ta bini di pordoná i ser pordoná.
Entre e dos oriyanan mi ta move den mi barku intrankil. Di un pa eotro, kasi sin realisá, e awanan i bientu ta hiba mi. Ta asina difísil pordoná. Ta asina milagroso ku nan por pordoná mi.
Ora e herida ya no tin remedi. I ora mi no por haña e kaminda riba kua mi ta kana, retené e palabranan papiá, kibra e silensionan doloroso, kontené e gestonan violento ku ta kibra di paden.
Ora no tin kaminda pa bai bek e ta manera pordon lo ta pretendé pa diskulpá pa e daño kousá. I esaki no ta posibel. Semper tin un kulpabel i un víktima.
Kiko mi mester hasi pa meresé pordon? Kua gesto di reparashon ta nesesario p’asina ku ta hustifiká mi lubidamentu òf e pas despues di a pordoná?
No tin nada ku ta sufisiente p’asina ku pordon ta sosodé. Ni e arepentimentu di e kulpabel. Ni su kastigu òf kondena. Nada ta sufisiente. Pasobra e dimenshon di e daño sufrí ta superá kualkier gesto di reparashon. E ta mas profundo, mas teribel.
Pues pa ami ta kla ku pordon nunka ta hustifiká. Mi no ta pordoná pasobra e debe ta pagá. E ta impagabel. Hasimentu bon no ta basta, ni e kastigu. Pordon únikamente por ta grátis.
Mi ta pordoná pasobra Hesus ta logra ku pordon ta logra ta brota den mi kurason. Únikamente Hesus por hasié. I si E hasié no ta pa E lo liberá e kulpabel di su kulpa. E lo mester hasi su propio kaminda di salbashon.
Si mi pordoná ta pasobra ta ami ta esun ku mester bòltu e blachi, laga renkor patras, sana e herida i ser liber.
Miéntras mi ta sigui para ketu den mi propio resentimentu nunka lo mi avansá, lo no krese i lo no ser liber. Lo m ta sigui kargando e peso teribel di mi doló. Únikamente pa grasia di Dios lo mi por tira mi mes den e mundu profundo di miserikòrdia akí.
Únikamente Dios por hasié, ami no. Mi ta sinti mi mes impotente i lo mi sigui eternamente kondenando e kulpabel, pasobra e meresé tur mi odio i mi despresio. Odio di henter mundu.
Pero ami no ta su hues, ni esun ku ta laga ehekutá su kondena. Esaki no ta toka ami. Ta keda mi únikamente di alehá mi mes di dje ku paso firme. Stòp di ekspon’é komo kulpabel di mi malunan presente.
Mi ta warda e daño kousá komo parti di mi historia, nunka lo mi no lubid’é. Pero pordon ta permití mi kuminsá un kaminda nobo di libertat, sin barera ni kadena.
Mi ta pidi Señor pa e duna mi e grasia di pordon. Pordoná pa salba mi bida, pa inisiá un kaminda nobo, un bida nobo. E pordon ku a toka den e rekonsiliashon ku Dios ta salba i i ta siña mi e kaminda di mi salbashon.

Papa Francisco ta komentá: «Ta importante pa nos topa ku e Miserikòrdia di Dios, espesialmente den e sakramento di Rekonsiliashon, teniendo un eksperensia di bèrdat i ternura».
Mishi ku e pordon di Dios, mirando ku e no meresé, ta siña mi e kaminda di pordon den mi propio bida. Mi no ta pordoná pasobra un hende meresé esaki. Mi no ta pordoná pasobra e ta arepentí i ta pidi mi pordon.
Mi ta pordoná ku un miserikòrdia yen di ternura ku ta bini di Dios. Si no ta asina e ta resultá imposibel. E pordon di Dios den mi bida a siña mi pordoná.