Dianan Marítimo 2022 Sektor marítimo ta di sumo importansia pa Kòrsou

Willemstad, – Dia 28 i 29 di sèptèmber 2022, Kòrsou i otro paisnan rònt mundu ta selebrá e siman Internashonal Marítimo. Esaki ta kulminá riba Dia Internashonal Marítimo ku ta e delaster djaweps di sèptèmber di kual e aña aki ta kai riba 29 di sèptèmber. Curacao Ports Authority (CPA), Kompania di Tou Kòrsou (KTK) i Curaçao Pilots Organization (CPO) den e kuadro aki ta organisá diferente aktividat e siman aki pa konsientisá pueblo i espesialmente alumnonan di skolnan sekundario riba e importansia di e sektor marítimo.
Tur aña e Organisashon Internashonal Marítimo (IMO) ta selebrá Dia Internashonal Marítimo ‘(World Maritime Day). Kada aña IMO ta para ketu na un otro tópiko di importansia pa e mundu marítimo.
E tópiko di e aña aki ta “New technologies for Green shipping”. IMO e aña aki ta uni industrianan marítimo globalmente pa eksplorá i selebrá teknologianan nobo pa un transportashon marítimo mas ekológiko.
Riba djamars 28 di Sèptèmber Minister di Desaroyo Ekonómiko, Sr. Ruisandro Cijntje huntu ku Direktor di CPA, Sr. Humberto de Castro a hasi apertura di e Dianan Marítimo 2022 splikando alumnonan di diferente skolnan sekundario ki importansia e sektor marítimo tin pa Kòrsou. Tambe e echo ku globalmente ta enfokando riba teknologianan nobo pa desaroyo di e mundu marítimo bira mas konsiente di nos medio ambiente.
Despues di apertura ofisial djárason mainta, alumnonan di diferente skolnan sekundario por a subi riba un boto di tou i pilot boat di KTK, hasi un rekorido den nos haf riba fèri, subi riba Seawaves di Sea Harbor services i tambe a haña informashon di diferente instansianan manera Carmabi, Green Phenix, Caribbean Sea Divers i tambe nos lotsnan a hasi un presentashon di kiko nan trabou ta kontené.
Djaweps 29 di sèptèmber, ku ta Dia Internashonal Marítimo, pueblo di Kòrsou por bishita Matheywerf di 6 or di atardi pa 9 or di anochi kaminda por hasi un rekorido riba fèri den haf, subi i sera konosí ku botonan KTK, Seawaves di Sea Harbor Services i haña informashon di tur e diferente instansianan ariba menshoná den forma di un Ban Topa. Lo tin bouncer pa mucha i tambe stèntnan ku por kumpra algu di kome i di bebe.