Dia pa dia ta bira pió….. Reunion di Parlamento a bira Babiloniko awe mainta

WILLEMSTAD. Awe mainta parlamento di Korsou mester a kuminsa reuni riba asuntunan importante di pais manera Wardakosta pero manera a bira tradishon semper tin ‘bottleneck’ ku ta stroba e reunion pa kuminsa na tempu.
Den siman ku a pasa parlamento a puntra Pisas si e ta bin bin parlamento pa papia riba denunsia di falsifikashon di dokumento riba refineria pero Banko Sentral a bisa ku a risibi denunsia i einan e wega a bai rònt i pone ku e reunion di parlamento a para bira wega di ping pong
Siman pasá e presidente a bisa ku reunion lo ta den siman di 6 pero a kompronde ku Newton ta den eksterior i dia 13 di februari e ta konfirma. na su turno Paulette no a mira pakiko señor Newton mester ta presente pasobra e no tabatei prome biaha i a pidi pa tuma kontakto ku Pisas pa papia e siman aki riba dokumentonan falsifika den un dje órganonan mas importante di nos pais.
Thodé a denunsia ku e kos aki ta baiendo for di man i naturalmente Thodé a bin tira piedra riba kaminda ku regla di formalidat pasobra ta riba Kustwacht ta trata no dokumento falsifika.
Aki Vraagpunt a subi mesa: ken ta presidente di parlamento of señor Thode pasobra Thodé ta koregi presidente konstantemente i ta laga papia riba kos ku no ta den tratamentu.
Señora Mac William a puntra tambe ken ta presidente dje reunion i presidente a reafirma ku ta su persona ta presidente pero Thodé a hala atenshon pa un despelote den mandamentu di dokumento ku parlamento a trata kaba i a bolbe haña pero di otro fuente. Asina sí ta bruwa kos.
Ora a kere ku e diskushon a kaba sra. Pauletta a referi na un karta ku a drenta di Hulanda tokante tradukshon di moshonnan i presidente a informé ku e no a haña nada ofisial.
Ma ainda Pauletta no a kaba i kier a sa si ta bai reakshona riba loke nan a papia internamente ku esaki pero presidente di parlamento lo manda e reklamo hulandes pa Komishon di Werkwijze.
Pero segun Mac William lo ta mihó ainda ku saka un komunikado pa splika pueblo ta ki ta pasando.
Ora ku a kere ku awor si reunion por a sigi e miembro Zita Leito a bin ku otro reklamo i presidente a priminti e miembronan ku e lo bai tuma
kontakto ku despacho si Pisas por bin e siman aki.
Pa kolmo awe mainta nan a ripara ku a drenta dokumento di 60 pagina ku nan no ta haña tempu pa trata awe.
Riba e asuntu ku ke papia ku Pisas, Ministerio Públiko a anunsiá ku ni serka Prokurador General ni serka Fiskal Mayó no tabata tin konosementu di denunsia ku siman pasá lo a keda entregá.
E notisia a bai manera baño di awa friw pasobra awor sí e konfushon ku si tin denunsia of laga a yega su kulminashon.