Tumando e sirkunstansia aktual relashoná ku e krísis di Covid 19 na konsiderashon, ta rason pa tur hende para ketu na loke nos ta pasando aden i e impakto ku esaki tin den nos bida. Dia di Mama 2021 di ningun manera no ta di kompará ku algun aña pasá, pasobra e sirkunstansia en general ta unu di lamento. Pa kuminsá, kuantu mama lo no tei mas presisamentu pasobra e malesa aki a toka nan i a resultá nan fatal? Òf otro kasonan tristu kaminda un famia yegá a bandoná e mundu aki pa motibu di Covid 19. Kanando den nos sentro di siudat, den e kayanan di Punda òf Otrobanda e dianan aki lo mester lanta sintimentunan di tristesa i òf nostalgia. Tur kaminda ta reina un kietut masha konmovedor mes. E situashon aktual mester pone nos tur pensa i hasi kada ken komprondé ku huntu nos por limitá pobresa i sufrimentu den e mundu aki si ta tene sufisiente kuenta ku otro su konosementu, kapasidat i potensial, trata otro manera bo tambe ke keda tratá. Kòrsou ta un isla sumamente atraktivo den Karibe, ku nos playanan bunita, ku paisahenan atraktivo, komo tal nos naturalesa i medioambiente so kaba ta kapas pa gana mundu hinter na nos banda. Un punto masha krusial ta sinembargo e manera kon nos ta atendé ku otro pa duna direkshon na kosnan ku mester sosodé i haña solushon pa difikultatnan ku presentá. Komunidat di Kòrsou kompletu segun mi mester uza e momentonan aki pa pensa i palabrá formanan nobo i diferente pa atendé nos asuntunan, no laga e krísis aki pasa bai sin saka e lèsnan ku por. Preguntanan manera kon por drecha sirkunstansianan di trabou di manera ku hinter e isla aki por probechá pa dal pasonan sólido padilanti, ta e tipo temanan ku nos mester kuminsá atendé ku urgensia. Kon ta drecha nos skolnan pa nos alumno, studiante, maestro i dosentenan tin mihó temporada, siendo ta konstantemente den un ambiente asina importante. Subi kalidat di bida na Kòrsou, apsolutamente no mester zona komo algu imposibel si traha planifiká, kuminsando sistemátikamente den nos barionan. Ayera programa Bario pa Bario for di studio di emisora radio Hoyer a dediká na Dia Di Mama, pero den nos mente tabata pasa konstantemente e sirkunstansia den Kòrsou. Mas ku nunka nos ta konvensí ku esaki ta e momento pa no únikamente para ketu na e funshon klave di kada mama òf por lo general kada mayor komo edukador. Masha gradesido nos ta na tur esnan ku no opstante e situashon finansiero difísil di Kòrsou aktualmente a duna un man pa e selebrashon aki for di studio di radio Hoyer por a kana zetá. Danki na e kolaborashon sublime di e empresanan SAI IMPEX, di señor Deepak Rachwani, ku su negoshi situá den Columbusstraat 1(A), 2(B), A&J Liquor and Tobacco (Tina & Annie) na skina Columbusstraat/ Madurostraat nr.31, tambe señora Jenny Schultz i señora Kelly Kirindongo, Fundashon Bario pa Bario i otronan ku nos por tabatin algun premio pa un evento di focus riba nos mamanan. Ganadónan di premio ta Meredith Koeyers, Delaida Martis, Lelia Ersilia, Norman Kooks, Venacio Gomez, Casandra Salecia, Elvis Francisco i Elizabeth Manuel. Programa Bario pa Bario lo sigui den su afan pa promové bon relashon den e komunidat di Kòrsou i alsa e popularidat di nos isla den Karibe i sobrá partinan di mundu. Dios Tata Todo Poderoso bendishoná Kòrsou i su hendenan, sirbi nos komo guia pa aktua korekto, manteniendo fe i perseveransha tambe den futuro.
