DI TRINTIUN DJADUMINGU SIKLO B

Promé Lektura : Deuteronomio 6, 2-6

Salmo : Salmo 18, 2-4, 47, 57
Di dos Lektura : Hebreonan 7, 23-28

Evangelio : Marko 12, 28-34

Lo prinsipal ta stima
Nos lo mester ta agradesido na e bon doktor di lei ei dor di a formulá e pregunta akí na Hesus, kende a duna okashon pa aklará, tambe pa nos benefisio, kua ta e promé i mas importante di e mandamentunan. Nos tambe ta move mei mei di innumerabel normanan den nos bida eklesial (e Kódigo di Derecho Kanóniko ta kontené 1752 kánon).
E mandamentu grandi di Hesus ta esun di amor den dos direkshon. E promé mandamentu ta stima Dios, dunando E un lugá di honor den nos bida, den nos mentalidat i den nos herarkia di balornan. Stima Dios ta nifiká skuch’é, ador’é, topa kuné den orashon, obedesé su boluntat, stima loke E ta stima.
E mundu di awe ta invitá nos na lanta altarnan na otro diosnan, mas o ménos atraktivo. Manera esnan di e pueblo elegí tabata skucha e “Skucha Israel, Señor Dios ta nos úniko Dios”, nos lo mester skucha: “skucha, kristian, e promé mandamentu tei ainda: lo bo no tin otro diosnan mas ku ami”.
E di dos ta stima e próhimo, esnan simpátiko i esnan ménos simpátiko, pasobra nos tur ta yu di mesun Tata i pasobra Kristu a entregá su mes pa nos tur. I stima nan “manera nos mes”, ku ta un medida masha konkreto i generoso.
Hesus ta uni nan dos, ku ya a aparesé den Tèstamènt Bieu. E promé nos a lesa awe mes den Deuteronomio. E di dos ta den Levítiko 19,18. Loke Hesus ta hasi ta igualá nan dos i hasi di nan un so: “no tin niun otro mandamentunan mas grandi ku esakinan”
Ser siguidónan di Hesus ta únikamente stima Dios. Ni únikamente e próhimo. Sino e dos kosnan huntu. No ta bale la pena bisa ku un persona ta stima Dios i ta deskuidá otronan. No ta bale la pena bisa ku un persona ta stima e próhimo, lubidando riba Dios i riba e motivashonan sobrenatural ku Kristu a siña nos pa e karidat fraterno. Huan, den su promé karta, ta afirmá ku esun ku ta bisa ku e ta stima Dios i no ta stima e próhimo, ta un mentiroso. Si nos ta stima Dios, nos mester stima esun ku Dios ta stima: e hende.
Den e Ritual di Boutismo, na komienso di e selebrashon, e ministro ta puntra mayornan d e mucha si nan ta dispuesto na “eduká nan den fe”, p’asina ku e mucha aki, “kumpliendo ku e mandamentunan di Dios, ta stima Señor i e próhimo, manera Kristu ta siña nos den e Evangelio”. E ta enserá pues tur loke e bida di kristian ta kontené ku e mesun palabranan ku Hesus ta bisa den e Evangelio di awe.
Ta interesante ku e doktor di lei ta suprayá un kos ku Hesus ta afirmá den otro momentonan di e evangelio: ku e dòbel amor aki pa Dios i pa e próhimo “ta bal mas ku tur holokousto i sakrifisionan”, o sea, ku karidat ta un mandamentu superior inkluso ku esun di e kulto litúrgiko dirigí na Dios.
Siguiendo profetanan di Tèstamènt Bieu, Hesus ta bisa mas di un be: “miserikòrdia mi ke i no sakrifisio”.
E alabansa di Hesus na e doktor di lei -”no ta leu di e reino di Dios”- talbes nos lo mester aplik’é na tantu personanan di otro rasa i religionnan ku ta mustra nan honestidat i bon boluntat prinsipalmente den nan bon kurason i den nan karidat pa ku otronan. O sea, na personanan ku ta duna importansia na amor den nan bida.
Den e momento aki di eksamen di konsenshi ku, si nos ta sabi, nos ta hasié na final di dia, lo ta bon si nos hasi nos mes e pregunta aki: mi a stima awe? Òf mi a buska mi mes? No laga nos ban entretené nos den otro direkshonnan no asina “prinsipal”.
Momentonan promé di bai na risibí ku Kristu ta