DI TRINTA DJADUMINGU SIKLO B

Promé Lektura : Yeremías 31, 7-9 Salmo : Salmo 126, 1-6 Di dos Lektura : Hebreonan 5, 1-6 Evangelio : Marko 10, 46-52

Dios ta debolbé bista na siegunan

Loke Dios a primintí, segun Yeremias, di ku e lo a laga e pueblo bolbe, ku gran goso, di e deportashon, inkluí esnan “siegu i koho”, ta ser kumplí den Hesus.
Lo di debolbé bista na esnan siegu ya a ser anunsiá, prinsipalmente den Isaías, komo uni e signonan mesiániko. Ta pesei e kuater evangelistanan ta konta episodionan di kurashon di siegunan. E ta un di e “signonan” mas ekspresivo di e salbashon ku e Mesias mandá pa Dios ta bini na trese.
Tristu ta destino di siegunan. Nan skuridat a kontinuá, e abandono ku nan a kustumbrá di sufri den e sosiedat, ku tabata obligá nan kasi semper na e bida di pididónan di limosna, tabata un retrato bibu di e miseria humano i di e marginashon sosial.
Pero e ta siegu akí di wowonan di e kurpa ta símbolo di otro klase di ta siegu. Tin personanan ku ta gosa di masha bon bista físiko, pero por bisa ku nan ta siegu spiritualmente. Esaki ta parse ta e intenshon di ku Marko ta pone e milager aki mei mei di otro esenanan ku ta suprayá e inkredulidat di e hudiunan i e komprendementu torpesa di e apòstelnan.
Otronan ku a kere ku mas bista, no a sigui Hesus. Bartimeo, sí.
Nos por sinti nos mes un poko manera Bartimeo. Manera ora ta bai na un okulista pa e laga hasi nos un chekeo di nos bista, awe nos por reflekshoná tokante kon nos bista spiritual ta bai. No por bisa ku nos ta siegu, pasobra nos a kaba di mira loke Dios ke pa nos mira, f nos ta konformá nos pa kana dor di bida entre skuridat, ora nos tin e médiko okulista serka, Hesus, e Lus di mundu? Nos lo mester hasi e orashon di e siegu di Yériko di nos: “Maestro, mi ke mira”.
Den e akto penitensial ku kua nos ta kuminsá Eukaristia, nos kada be tambe ta kanta e mesun invokashon ku Bartimeo tabata grita: “Hesus, tene kompashon di mi”. Nos tur tin algun malu di kua nos lo mester “grita” Hesus pa e liberá nos.

Nos ta yuda esnan den nesesidat?
Tambe nos or laga nan reta nos dor di e esena di e evangelio den e sentido di kon nos ta trata siegunan ku ta kant’i kaminda, buskando, gritando nan deseo di mira. Tin hopi persona hóben i mayornan ku no ta haña sentido na bida i ku por dirigí nan mes na nos, kristiannan, pa si akaso no por duna nan un kontesta na nan preguntanan.
Nos ta esnan ku ta ser molestiá pa e gritunan ei, pasobra semper esun ku ta pidi òf ta formulá preguntanan ta resultá inkómodo? Òf nos ta aserká e persona i nos ta dirigié na Hesus, bisando e di forma amabel: “ánimo, lanta ariba, E ta yama bo”?
Yeremías a yuda su kontemporáneonan, tantu ora el a avisá nan di e malunan ku e deterioro di nan fe lo bai na trese pa nan komo ora el a anunsiá nan e final di e deportashon i e bondat di salbashon di Dios.
Hesus a para ora El a tende gritunan di e pober siegu. Semper E tabatin tempu pa esnan ku tabatin mester di djE. Hopi be su disípulonan tabata pèrdè pasenshi ku muchanan òf ku e pididó di limosna akí ku tabata grita. E, no.
Kuantu persona e komunidat di Hesus a yuda a lo largu di historia pa haña pas i kaminda, rekobrando e bista! Na kuantu persona a anunsiá e Bon Notisia di e amor di Dios!
Kristu ta e Lus di mundu. Pero tambe El a enkargá nos pa nos ta e lus i ku e lampi aki ta iluminá tur hende, p’asina ku nan no ta trompeká i mira e kaminda. Kuantu persona nos a yuda na mira, kuantu persona nos por a bisa lanta ariba i i akudí na Kristu Hesus?
E enkargo tambe ta bai pa nos: “yam’é”. No lag’é tira kant’i kaminda. Bis’é ku mi ta pasando. Nos kristiannan mester ta evangelisadónan. Mundu ta siegu? Yam’é! Grit’é, si ta e kaso.
No kansa. Saka un man, dun’é ánimo: “ánimo, lanta ariba, E ta yama bo”.