DI SHETE DJADUMINGU DI PASKU DI RESUREKSHON

Promé Lektura          : Hechonan di apòstelnan 1, 15-17, 20-26

Salmo                          : Salmo 103, 1-2, 11-12, 19-20

Di dos Lektura          : 1 Huan 4, 11-16

Evangelio                   : Huan 17, 11-19

Ningun di nos a konosé Hesus. I ningun di nos a mira Dios. Pero nos tur ta manera e mucha chikí ku hopi entusiasmo i imaginashon a sa di traha un dibuho di Dios. Ora su mama a mir’é el a puntr’é: kon bo ta bai na pinta Dios si ningun hende sa kon E ta? I e mucha, ku tur su inosensia, a kontest’é: nan lo sa ora mi kaba ku mi dibuho.

Ami tambe a purba na pinta Hesus ku mi no konosé i e Dios ku nunka mi a mira ku palabranan: palabranan di Santa Skritura i palabranan di mi. I algun hende lo por a bisa: kon no por papia di un hende ku nunka mi a mira?

I ohalá lo mi tambe lo por a bisa ku e inosensia di e mucha: nan lo sa ora mi kaba di papia; nan lo sa ora nan skucha proklamashon di e Palabra; nan lo sa ora nan kuminsá na biba segun e Palabra; na lo sa ora nan ta stima manera Dios ta stima.

Nos sa ku un hende ta e mihó futbolista, no pasobra prensa ta bisa esaki, sino pasobra e ta gana partidonan i ta hasi su trabou masha bon mes.

Nos sa ku Dios ta amor, no pasobra pastornan ta bisa esaki, sino pasobra den Hesukristu El a duna bida pa tur hende, pa esnan bon i esnan malu.

Nos sa ku Dios ta amor, no pa loke nos ta bisa òf kon nos ta pint’é, sino pa e bon ku nos ta hasi pa otronan.

Dios no es una enseñansa maravioso. Dios ta un bida simpel i entregá.

Nos ta e retrato di Dios i di Hesukristu ora nos ta stima. Nos ta e embahadornan di Dios i di Hesukristu i nos tin ku representá nan bon, nos tin ku papia bon i nos tin ku hasi loke nan ta hasi, stima.

Hesus, den e evangelio di awe, ku ta su diskurso di despedida, ta hasi un orashon pa nos, su disipelnan, su siguidónan. Hesus ta resa pa nos.

“Hesus a hisa su wowonan na shelu i a bisa: Tata santu, warda esnan ku Bo a duna mi. Awor mi ta bolbe serka Bo. Mi no ta pidi Bo pa kita nan for di riba mundu, ma pa Bo protehá nan kontra e malbado. Konsagrá nan pa medio di e bèrdat”.

Esaki ta e orashon di Hesus pa nos. Ki distinto di nos orashon!

Nos ta resa i ta pidi kosnan ekstrabagante, grosero, innesesario i tin be skandaloso.

Hesus ta pidi su Tata Santu pa e unidat di su siguidónan. Union ta signo di amor; divorsio ta signo di falta di amor, “inkompatibilidat di karakternan”, un manera fini pa bisa ku amor a kaba, ku nos no ta wanta mas.

Dios no ta divorsiá di su yunan. Su fidelidat ta pa semper. I Hesus ta resa p’asina ku nos  no ta diborsiá ni di Dios ni di e rumannan.

Hesus ta kabes di e kurpa, di Iglesia, i na djE nos mester ta uní dor di amor i uní na e komunidat ku huntu nos ta forma.

Ku tur hende sea un. Un den e Dios ku ta salba nos.

Tabatin dos hòmber ku a noufragá i, landando, nan a yega un isla bandoná. Un di na a grita desesperá: aki nos ta bai muri, aki no tin awa ni lus, no tin nada.

E otro a bis’é no tene miedu, konfia den mi. Mi ta gana shen mil florin pa siman. I kiko bo florinnan lo sirbi aki?, e kompañero a bis’é.

No preokupá bo pasobra mi ta duna e diesmo kada siman na mi iglesia i sigur, sigur mi pastor lo haña mi.

Dios no ta pidi nos e diesmo. Dios ta pidi nos shen porshentu di nos amor. Y Dios no kier esaki pa su so, e kier pa nos duna nos rumannan. E unidat pa kua Hesus ta resa ta e unidat den amor, den e úniko Dios i Tata pa tur hende.

Akí, den iglesia, nos ta bin pa selebrá e unidat di Hesus i den Hesus. Hopi i tur distinto, hopi i tur manchá ku e mesun pikánan, hopi pero tur mirando e mesun Señor, keriendo den e mesun Tata i guiá dor di e mesun Spiritu.

Aki, nos ta biba e alegria di orashon i e don di unidat. Aki nos ta sinti nos mes tur ruman. Pero Señor ke pa e unidat aki ta prolongá einan pafó.

“Mi no ta resa pa Bo kita nan for di riba mundu, ma pa Bo protehá nan kontra e malbado. Konsagrá nan pa medio di e bèrdat”.

No saka nan di e mundu. Nos mundu chikí, yen di egoismo, droga, krímen, divorsio, odio, soledat, malesanan… tin ku salba e mundu aki i den e mundu aki nos ta yamá pa biba nos fe, duna speransa na tur hende i praktiká amor. I for di e mundu chikí akí, tin be difísil pa komprondé i akseptá, nos tin ku ekstendé un brùg te na un mundu mas grandi, mas limpi, mas puro, mas fraterno…e mundu di e amor di Dios.

Nos ta biba, traha, sufri i muri riba nos mundu chikí, pero nos ta di e mundu di Hesus.

I mandá na mundu pa kontinuá ku e tarea ku Hesus a kuminsá kuné:

• anunsiá e Dios amor.
• ser embahadornan di Dios.
• sana mundu.
• derotá e malbado.
• krea unidat entre hendenan.