DI SEIS DJADUMINGU DI PASKU DI RESUREKSHON

Promé Lektura          : Echonan 10, 25-26, 34-35, 44-48

Salmo                          : Salmo 98, 1-4

Di dos Lektura          : 1 Huan 4, 7-10

Evangelio                   : Huan 15, 9-17

Un dia tabatin un sapaté masha bieu i hopi kansá. E tabata deseá di muri pa e bai serka  Señor i e tabata deseá pa Señor a bishit’é den su tienda.

Un dia miéntras e tabata resa el a skucha un bos ku a bis’é: Mañan lo mi bai na bo tienda. El a kuminsá traha mas felis ku nunka pero nada spesial no a sosodé.

Un ratu despues un señora a drenta kehando di algun mucha ku tabata insult’é i a hòrta  parti di su kompra. E sapaté a papia ku nan i nan a primintí di no hasié mas.

Mas lat a drenta un strañero puntrando pa un direkshon i el a kompañ’é te na e lugá indiká.

Despues a drenta un mucha muhé chikí ku su tata ku tabata malu i huntu nan a bai buska  un dòkter pa e bishit’é.

Poko promé di sera tienda a yega un pididó di limosna ku tabata ke kome i el a hib’é na   un toko i a kumpra kuminda p’e.

El a sera su tienda i a bisa, Señor no a bin bishitá mi. Ya na kas i promé di subi kama el a resa bisando: Señor, awe mi tabata mashá okupá, mi ta spera ku bo no a bin bishitá mi miéntras mi tabata pafó.

I un bos a bis’é: “Mi a bin bishita bo den kada persona ku bo a yuda. Mi sa ku bo a disfrutá di mi presensia. Mi ta mashá kontentu ku e bon trato ku bo a duna mi”.

E palabra di Dios no únikamente ta bisa nos ken Señor ta sino ken nos ta i kua ta nos  relashon kuné i ku e rumannan.

Ami ta e Bon Wardadó i mi ta duna mi bida pa mi karnénan, pa boso.

Ami ta berdadero mata di wendrùif, si boso no keda den Mi boso no por karga fruta.

Awe, Señor ta bisa nos: “Ya mi no ta yama boso sirbidó, mi ta yama boso amigu”.

Hesus ta e amigu di infansia, di hubentut i di semper. Hesus ta e amigu ku ta bin konta nos su gran sekreto. I e sekreto ku Hesus ta konfia na nos no ta pa ser wardá sino pa ser publiká tur kaminda. E sekreto di Hesus ta esun mas importante pa nos bida.

Laga mi konta  bo un sekreto: abo tin un namorado.

Ami, un namorado? Si mi ta un mucha.

Ami, un namorado? Si mi ta kasá.

Ami, un namorado? Si mi ta un saserdote.

Ami, un namorado? Ki mas mi ke!

“Mi ta laga boso konosé  Mi Tata. I mi Tata ta Amor”. “Keda den mi Amor”.

Esaki ta e namorado ku nos tur tin: Dios Tata.

E Tata akí a duna nos su yu pa konta nos di su amor i pa demonstr’é ku e prueba di sanger. “No tin amor mas grandi ku esun di duna bida pa amigu”.

Esaki ta e amor grandi i pashoná di nos amigu Hesus: El a muri pa amor i ta sigui bibu i  resusitá pa sigui  stima nos.

Un eskritor ta bisa ku namoramentu ta kestion di atenshon. Un ta fiha su atenshon den un detaye di un persona: un mancha, algun wènkbrou grandi, un orea rondó, algun wowo bèrdè… boso sa muchu mas ku ami di esaki, i ta surgi e flechazo. I nos atenshon ta keda grabá den e punto chikitu insignifikante pa semper. I den ki detaye Dios a fiha su mes pa namorá di mi?

No den bo estatura, ni den bo koló, ni den bo manchanan, ni den bo wowonan…

Dios a fiha su mes den bo kurason, ku El a traha pa stim’é i e rumannan.

Dios ta amor i bo ta stimá pa Dios.

Dios ta amor i El a skohe bo, maske ainda bo no a kontest’é.

Esaki ta e sekreto di Dios, di Hesus, di su palabra. Sekreto kontá tur kaminda den tur iglesia di mundu.

“Keda den mi amor. Stima manera Ami a stima boso”.

Egoismo, pashon, instinto, soledat i karni ta hiba nos na tene relashon manera animal. “Stima manera Ami a stima boso”. Entregando bida pa otro.

Un hóben misionero predikando pa indjannan a bisa nan ku Dios ta amor.

Ora el a kaba di papia e hefe di e tribu a puntr’é: Ora bo a papia di e gran Spiritu bo ta yam’é Tata? Sí, e misionero a bis’é .

Esaki ta nobo i masha bunita p’ami, e hefe a bisa. Nos nunka ta yama e gran Spiritu Tata. Nos ta skuch’é den bos, den welek, den tormenta i nos ta sinti hopi, si hopi miedu. Ora bo ta yam’é nos Tata esaki ta zona masha bon den nos oido.

Misionero, bo a bisa ku e gran Spiritu ta bo Tata? Sí, el a kontest’é.

I bo a bisa tambe ku e ta Tata dje indjannan? Sí, el a kontest’é.

E ora ei, e hefe bieu a sklama, manera hende ku a spièrta pa un gran alegria, …… e ora ei abo i ami ta ruman.

I esaki ta tambe e sekreto di Hesus: boso ta ruman.

Ruman pasobra sanger di Dios ta kore den nos tur su bena, su yunan.

Ruman pasobra Spiritu Santu a yena nos tur ku e mesun amor di Dios.

Ruman pasobra únikamente tin un Tata di tur hende, Dios.

I mas ruman ora nos ta kumpli ku e palabra di Dios ku ta manda nos: “esaki ta loke Mi ta manda boso hasi: stima otro”.

Sekreto ku nos no tin ku tene pa nos mes. Plama e notisia !