Di dos Djadumingu di Pasku di Resurekshon, Fiesta di Dios su Mizerikòrdia

Promé Lektura : Echonan 5, 12-16
Salmo : Salmo 118, 2. 4, 13-14. 22. 24
Di dos Lektura : 1Pedro1, 3-9
Evangelio : Huan 20, 19-31

Hesus a resusitá. Esaki ta e gran bèrdat di fe. Kualkier persona ku ta deklará su mes kristian lo tin den sentro di su kurason i di su bida e eksperensia di esun resusitá. Pa kreyentenan tin presensia di resurekshon ta algu asina manera lus di solo ku kada dia ta karisiá nos ku su rayonan…
Pero, Kiko ta sosodé ku esnan alehá o ku esnan débil den fe? Kiko ta pasa ku e personanan ei ku a tende nan papia di resurekshon di Hesus, pero nunka a eksperimentá esaki? Kiko hasi ku e rumannan akí di kua nan fe a para ketu únikamente den e miedunan despues di e krus?
E Evangelio di awe ta trese den mi mente un frase ku mi ke duna sentido na e eksperensia di esun Resusitá: “su heridanan a kura nos…” Normalmente ora nos tin herida loke nos tin ku kura dor di nos parti. Nos salú tabata den Hesus su heridanan. Nos kristian mester meditá esaki di dia i anochi. E heridanan ku Hesus a sufri ta kurando mi…
Hesus ta aparesé na e Apòstelnan riba mesun dia di regreso na bida. E eksperensianan di bida pa masha fuerte ku nan ta, tin ku yuda nos komprendé ku Esun Resusitá ta asina serka di mi ku mi por sintié den e momento nesesario di mi sufrimentunan. Tin bia ku nos ta primintí otronan ku e futuro ku Dios lo ofresé nos lo ta mihó i nos ta lubidá ku e futuro di Dios yama “awe” pa esnan ku den e bida aki nos ta purba siguié. Unda e Esun kua resusitá ta awe? Den bo bida, den bo dolónan, den bo speransanan. El a yega, a resusitá i a akudí na esnan di djE. Hesus ta yega kada bia di nobo na nos bida manera olanan den kant’i laman, loke ta sosodé ta ku nos mirada hopi biaha no ta yen di atmirashon sino di duda i deskonfiansa.
Tabata falta un disipel, Tomás, esun ku no ta kere den kosnan grandi di Dios ku fasilidat. Tomas ta e mundu di awe ku ta pidi prueba i sertesa. E pruebanan ku nan ta pidi ta asina grandi ku únikamente Dios por duna nan ku su resurekshon.
Nos ta pidi Dios muchu ora en realidat nos mes ta un misterio pa nos, i inkluso pa otronan. Únikamente pa Dios nos no ta un misterio. Dios sa loke ta biba den nos kurason i sa na duna e kontesta adekuá den e momento adekuá. Dios sa di nos morto i resurekshon, di nos kobardia, grandesa i miseria. E sa di e lodo for di kua nos a ser trahá. Biba den kristian ta sintonisá nos bida ku e ritmo di Dios, únikamente asin’aki bida lo duna nos kontesta.

Hinka dede den e heridanan di Hesus ta drenta den su paden, deskubrí su dolónan i su entrega pa nos. Nos no ta biba hopi bia un fe superfisial ku no ta transformá nos? Drenta den interior di Kristu ta sinti manera E.
Nos bida ta yen di piká i erornan ku ta multipliká na e medida ku nos ta alehá nos mes di Dios. No ta straño por tantu ku den e teksto di aparishon di Hesus ta aparesé e referensia Na Spiritu Santu i na pordon di pikánan. Akseptá Spiritu Santu ta akseptá presensia di Dios den mi bida, i ora un persona ta ku Dios i den Dios, piká tin masha poko protagonismo den su eksistensia.
Tomas a pidi pruebanan vital. E tabatin mester di mira, mishi, sinti, mishi ku presensia di esun supuesto resusitá. Evangelisashon no ta otro kos ku ofresé otronan e eksperensia sensibel aki di Hesus. Kere ta mira, mishi, sinti Kristu. E krísis di e apòstel tabata mas di fe ku di rasonamentu.
Ora nos ta hiba un kaminda den direkshon na esun resusitá e dudanan ta kada bia ménos. Tin personanan ku ta sufri di paden pasobra nan dudanan no ta laga nan konfia den ningun hende ni den nan mes. Kiko un persona sin fe mester pa sinti presensia di esun Resusitá? Nos tin e impreshon ku tin ku kuminsá na prinsipio; bai kada bia di nobo di Bètlehèm i na e Krus i na Djadumingu di Resurekshon ku atmirashon i rèspèt. Ora nos ta hinka nos dedenan den e heridanan di Kristu e lo no produsí doló sino amor, un amor ku ta kombertí e kurason di esun ku ta aserká E.