DI DIESDOS DJADUMINGU SIKLO B

Promé Lektura : Job 38, 1. 8-11
Salmo : Salmo 107, 23-26, 28-31
Di dos Lektura : 2Korintio 5, 14-17
Evangelio : Marko 4, 35-41

Tempestat i miedu
Laman semper tabata, en partikular den e mundu bíbliko, un forsa natural digno di atmirashon, pero tambe yen di menasa, sinónimo di peliger i di e lugá kaminda e maligno ta biba. Esaki no ta únikamente pa e barkunan ku ta nabegá dor di dje –manera e disípulonan ku tabata piskadónan eksperimentá, pero e dia ei nan tabata teme lo pió- manera pa e habitantenan di nan serkania: puntra e víktimanan di e último “tsunami” di Asia. Un tempestat ta tambe un símbolo bon di e krísis humano, personal i sosial. Nos tur algun be ta eksperimentá den nos bida mal tempunan chikí òf no asina chikí i nos sinti nos mes sakudí i mareá pa forsa di e olanan. Tantu den e bida personal komo den esun sosial i den esun eklesial, tin be ta toka nos rema kontra korientenan i bientunan kontrario ita duna e impreshon di ku e barku -por ehemplo e barku di Iglesia, ku ta nabegá dor di e laman di e mundu aki i no presisamente den un krusero di plaser- ta bai hundi. Nos kurason ta tin be agitá i miedu i kansansio ta drenta den nos, òf duda i mareo ta asaltá nos. Por tin den nos bida turbulensianan, ideológiko i interogantenan masha serio tokante eksistensia di malu den mundu, òf tokante Iglesia mes, òf e aktualidat di su doktrina moral, òf e mal ehemplo di algun di su pastornan òf e eskases di vokashonnan. Otro benan nos ta ser sakudí dor di dudanan inkluso di fe i krísis personal di fidelidat.

Hòmbernan di poko fe
No a primintí kristiannan un travesia pasífiko di e laman di e bida aki, aunke nos tia hiba Kristu den e barku. Nos historia tin be ta un historia di tempestatnan. Ora Marko ta skirbi su evangelio, e komunidat kristian ya sa hopi d persekushonnan i di difikultatnan.
Ademas, hopi be ta parse ku Dios ta keda ketu i ta mustra indiferente na nos malunan i Kristu ta pasifikamentu drumí miéntras sobránan ta lucha pa nan bida. Sigur ku algun be na nos tambe a yega un orashon di protesta spontáneo, kehando di e aparente lehania di Dios i ku deseonan di grit’é manera Job na Jahvé, òf manera e disípulonan na Hesus: dikon bo ta drumi, no ta importá Bo ku nos ta hundi? Nos lo a hasi e preguntanan di nos ku e salmistanan a tribi di dirigí na Dios: “Señor, no keda ketu, spièrta, lanta i defendé mi”, “lanta ya, pakiko bo ta drumi, Señor? Pakiko bo ta skonde bo kara pa nos?”, “te ki ora, Señor, lo Bo sigui lubidando riba mi?”… Talbes nos tambe meresé, den e sirkunstansianan aki, un skual di Dios todopoderoso i miserikordioso, na kua nos ta pidi aklarashon dikon e ta permití malu, òf di Kristu, ku mester tira na nos kara poko fe, maske despues di a presensia ku E ta dominá no únikamente enfermedatnan i morto, sino tambe forsanan di naturalesa: pakiko boso ta asina kobarde? Dikon boso tin asina poko fe?

Nos falta mas fe, un fe ku ta yuda nos rema kontra bientu i marea. E Dios ku ta kreador omnipotente ta alabes Tata. Esun ku a krea laman ta e Dios salbador i serkano. Kon nos por pensa ku e no ta buska nos bon? E Hesus ei ku ta den nos barku, maske nos ta mir’é drumi, kon nos por sospecha ku no ta import’é nos destino, òf ku e ta keda indiferente dilanti e posibilidat di ku kada un di nos ta hundi òf no? Tambe e morto inhustu di Hesus riba krus por a lanta interogantenan dramátiko, pero Dios a saka bon di e morto akí pa henter humanidat.
Loke ta pasa ta ku Dios tin be ta parse di ta keda ketu òf ta drumi. Na lugá di respondé di forma rashonal na nos preguntanan, e ta sugerí na nos otronan, manera Jahwé na Job, i manera Kristu na su apòstelnan. Por ta ku E no ta preokupá tantu e interogantenan ku ta pone preshon riba nos, sino otronan ku nos no ta tene kuenta kuné i segun E ta mas importante. Lo no ta ku Dios ta preokupá mas e kalmu di nos barku ku e turbulensianan di su travesia? Nos flohedat ku nos miedunan? nos konformismo i outo satisfakshon ku nos dudanan?
Talbes nos lo keda sin sa e kontesta rashonal di nos interogantenan, pero nos lo mester biba nan ku konfiansa den e Dios ku ta salba ku lo sa kon logra nos bienestar den tur kos. Dios ta presente den nos i no ta drumi, maske ta parse asina. Nos lo hasi bon den resa, ku e orashon ku den misa ta sigui despues di Nos tata: “libra nos di tur malu… protehé di tur tribulashon”…