DI BINTISHETE DJADUMINGU SIKLO B

Promé Lektura : Génesis 2, 18-24
Salmo : Salmo 128, 1-6
Di dos Lektura : Hebreonan 2, 9-11
Evangelio : Marko 10, 2-16

\Un di e problemanan mas doloroso di e famia moderno ta divorsio. Den novela, den revista, den kòmbersashonnan diario, ta menshoná esaki ku frekuensia. Riba kada dia hopi ta pasa den e eksperensia akí i ta asumí e konsekuensianan. Nos ta mira mayornan separá, yunan konfundí, tenshon, rabia, frustrashon. Despues di purba en bano otro kamindanan di komprenshon i union, ora tur kos faya, ta pensa riba divorsio komo úniko solushon. Hopi tin suèltu despues i ta reorganisá nan bida. Otronan ta sufri añanan largu di e impreshon di a kibuká nan mes. Tras di e salida akí ku esnan kasá ta haña nan mes aden awe, ta eksistí un problema mashá fuerte: falta di union den famia. Ora di kasa tur hende ta soña ku union i komprenshon. Ora di divorsiá nan sa ku nan a frakasá. Lei sivil ta habri un kaminda i ta aseptá divorsio. Pero tambe nos mester konsultá nos konsenshi i nos tin ku puntra Dios kiko ta loke E ta pensa tokante e problema aki. E evangelio di awe por iluminá nos.
Den tempu di Señor, tabatin e mesun problema familiar i lei tabata aseptá divorsio. Algun enemigu di Señor tabata ke pone un trampa p’E i nan a puntr’É: Un hòmber por divorsiá di su muhé ? Hesukristu ta papia di e plan di Dios na prinsipio, i di e lei di hende. E plan di Dios ta presentá e imágen ideal: keda uní pa semper. Lei di hende ta presentá e realidat ku nos ta biba: ora union ta imposibel, echo ta ku e pareha ta separá. E plan di Dios lo keda semper komo ideal, maske ku realidat humano no ta asina.
Promé kos ku Hesukristu ta pone bon kla ta e sagrado di matrimonio. E union di hòmber i muhé pa forma un hogar no ta un simpel eksperimentu. Si e ta funshoná, e ta kontinuá; si e no ta funshoná, ta suspendé, pa kuminsá di nobo. Tin hóbennan ku ta pensa di siguiente forma: nan ta hunga ku sentimentu i kurpa i nan ta hasi di nan bida un loteria den kua por gana òf pèrdè. Nan no ta duna nan mes tempu nesesario pa hasi di nan amor un kompromiso serio ku ta enserá sakrifisio huntu ku alegria. Matrimonio no ta un eksperimentu pasobra ta den wega nada ménos ku dos persona humano ku tur nan dignidat.
Matrimonio ta sagrado pasobra ta un donashon di dos persona i pasobra esaki tabata e plan di Dios, for di prinsipio. Dios, komo un gran artista, a laga pa final di su obra loke ta mas perfekto. Despues di a krea hopi kos: tera, awa, lus, mata i animal, el a krea e promé pareha humano. Beibel ta bisa, Dios a papia ku nos promé mayornan i a bisa nan: “KRESE “. I e forma pa krese lo ta entre dos, siendo nan dos komo un solo persona. Ta p’esei nos komo ser humano nunka por krese nos so, aislá. Pa krese nos tin ku duna i nos tin ku risibí. I e forma mas perfekto di duna i di risibí ta e pareha. Dios a kuminsá papia ku su mes den seno di Trinidat