DI BINTISEIS DJADUMINGU SIKLO B

Promé Lektura : Numbernan 11, 25-29
Salmo : Salmo 19, 8, 10, 12-13, 14
Di dos Lektura : Hakobo 5, 1-6
Evangelio : Marko 9, 38-43, 45, 47-48

Pa instinto natural, nos tur ta un poko sikólogo i nos ta gusta opservá e karakter, e manera di ser, e forma di komportá di otronan. Kisas nos ta preokupá nos mes den studia otronan mas ku di studia nos mes i koregí nos defektonan. Mesora nos ta mira falta di otronan òf loke nos ta kere ta falta i nos no ta mira, ni nos no ke mira, lo malu ku tin den nos mes. Kristu ta bisa nos den e evangelio ku “nos ta wak e splenter den wowo di e ruman i nos no ta fiha riba e balki den nos mes wowo”.

No semper nos ta mira otronan ku intenshonnan robes. Ku frekuensia tin personanan ku ta atraé nos atenshon, ku ta dominá nos. Algun talbes, nos ta despresiá; otronan nos ta envidiá pasobra nan tin òf nan ta mas ku nos. Ta resultá nos desagradabel personanan ku ta obra ku falsedat, ku ta kambia den nan manera di obra, ku ta bisa un kos i ta un obra nèt robes di loke nan ta bisa. Sin embargo, tin personanan ku nos ta atmirá. Nos ke ta manera nan, tin nan personalidat, poseé nan kualidat, ser respetá i atmirá manera nan. Nan ta sernan ku ta enkantá nos asina tantu ku nos por konfia den ku nunka nan lo hasi nos un mal hugada. Nan tin pensamentunan definí, kla, ta obra ku rektitut i nan ideanan ta konvinsente. No tin mentira ni engaño den nan bida.

E evangelio di awe ta duna nos un pouta pa nos kondukta. E ta trata na bisa nos pa nos no sea kaprichoso den nos bida i moda di obra, pa nos no kambia nos bon ideanan fásilmente, pa nos no aserká “e solo ku mas ta keintá”,