Detenidonan ku a bringa den korte a skucha nan kastigu ayera

WILLEMSTAD. E tres siudadanonan Robert Chapman (23 aña), Sjantiene Ersilia (25 aña) i e kolombiano Faridt Perez Cervera a presentá den sala di korte ayera pa tende nan sentensia.
Manera ta konosí e trio aki a pone un sensashon bastante brabu den sala di korte djabièrnè 9 di òktober último, despues ku e trio aki a keda akusá di dos atrako, pero den sala di korte, dilanti di wes mr. Snitker a pleita ku otro i pa finalmente e dos yunan di Kòrsou, Chapman i Ersilia kue otro ku moketa. E akusado Sjantiene Ersilia na e okashon aki a dal Robert Chapman benta largu abou na suela den sala di korte i tabata polis di parkèt Kleinmoedig ku a intervení pa logra establesé òrdu.
Tabata dia 1 di mart 2020 alrededor di mitar di un’or di mèrdia ku e trio a tira atrako riba e siudadano di inisial O.C. di 88 aña den Otrobanda na altura di e negoshi Kortijn Eis, rankando esaki su kadena di oro ku medayon for di su garganta i purba kita su renchi di oro for di su dede.