Detencion di Nigel Williams a lanta hopi duda atrobe riba Ministerio Publico

ORANJESTAD – Michael Williams tata di Nigel Williams, kende diasabra anochi tempran a wordo deteni na Dakota pa autoridadnan policial, a reacciona den un entrevista cu 24Ora, lansando algun acusacion serio na adres di Prome Minister Evelyn Wever Croes y tambe Minister Glenbert Croes.
Un frustracion y rabia di Michael Williams, kende diasabra a biaha pa Venezuela, tabata algo di spera, ya cu despues di e confrontacion entre yiu di Prome Minister Evelyn Wever Croes, esta Kevin Wever y Nigel Williams, ningun momento a haci algo contra yiu di e prome mandatario. Siendo cu den Ministerio Publico mencion a ser haci cu mester a detene 3 persona den e caso aki, cu ta Nigel, Kevin y e mucha homber di yiu muyer di Prome Minister, kende tambe ta meti den e agresion aki. Ordo a sali pa detene tur 3, pero Gobierno a cay aden y a stop detencion di Keven y di joncuman di su ruman muher.
Un confrontacion cu a laga un trahador herida, no a conduci na ningun detencion y despues cu a bin resulta cu tin grabacion di e incidente, tampoco detencion a cay, caminda ta mustra cu claramente por a mira cu Kevin Wever t’esun cu lo a herida e trahador di e lugar.
Of mihor mihor dicho e jocuman di ruman muher di Kevin, ta un di e autornan.
Inicialmente Prome Minister a reacciona mesora y hasta den reunion di Parlamento, a acusa “esposo” di miembro di fraccion di AVP, Gerlien Croes, di t’esun cu a agredi su yiu homber, mientras cu esaki no tabata e caso.
Ta for di algun dia caba hasta for di seno policial, tabatin informenan yegando na mesa di redaccion di NOBO, cu riba grabacion di e lugar, por mira cu ta yiu di Prome Minister ta esun cu lo a corta e trahador di e negoshi, pero Ministerio Publico lo no a saca ordo di aresto contra di e persona aki, kende despues hasta a biaha cu e mama.
Diasabra anochi te na un cas na Olijfistraat na Dakota, caminda riba ordo di Fiscal suplente a haya autorisacion pa drenta un detene e homber Nigel Williams, caminda famia di e persona aki, tabata sumamente disgusta mirando kico ta pasando.
Michael Williams, e tata di Nigel, den su reaccion tabata furioso, caminda el a cataloga tanto Prome Minister Evelyn Wever Croes y su Gobierno, cu lo ta un desaster pa pais Aruba, a mustra riba tanto acto di corupcion tumando lugar y cantidad di otro observacionnan basta pisa contra di e Prome Mandatario.
Entre otro Michael a mustra cu nan tin hende tur caminda, den un compania di seguridad cu lo ta trahando pa cuida cas di Prome Minister, cu nan tin hende den oficina di abogado di tata di Prome Minister y hasta a bay na mustra cu nan lo tin hende den e recepcion di proximo fin di siman ora cu e yiu di Prome Minister drenta enlace matrimonial y tene e recepcion na Tierra del Sol.
No ta for di awor Michael Williams ta cuestionando e forma di proceder di Ministerio Publico, tildando e departamento aki di ta persigui esnan cu nan kier y ta laga otronan cu ta yega na Gobierno sigui dilanti sin cu ta bay over na detene nan, apesar cu tin cantidad di prueba contra di nan.
Detencion di Nigel Williams si esaki ta relaciona cu e incidente cu yiu di Prome Minister, ta bira otro cuestionamento di un comunidad cu for di algun tempo caba ta cuestionando e forma di procede di Ministerio Publico y Michael Williams tambe a dirigi advertencianan serio den nan direccion.