Despues di 8 luna Misa di Lagun ta den uso atrobe

Djadumingu dia 16 di mei, nos Obispu huntu ku pastor Alfonso Bak di Westpunt a re inougurá nos misa di Lagun atrobe. Pa kasi 8 luna e misa tabata sera pa renovashon. Ora ku Pastor Bak a bini Kòrsou for di Boneiru i a wòrdu apuntá komo Pastor di Westpunt i Lagun, e a kuminsá traha masha duru pa pone e misa den un estado ku e por wòrdu usa atrobe. Danki na kooperashon di masha hopi persona i instansia e misa a keda kla i pa asina nos Obispu por  a inougurá e misa.

E interes tabata hopi grandi i ta bisto ku e misa aki tin un lugá den e bario di Lagun. Tin algun kos mas ku falta pa e misa ta kompletamente kla pero eseinan den kurso di dianan ku ta bini lo wòrdu hasi. Tambe ta deliberá e fecha sea den yüli òf Desèmber ku lo hasi un aktividat grandi relashoná ku selebrashon di fiesta di misa di Lagun.

Nos Obispu a felisitá pueblo di Lagun ku nan misa i tambe a para ketu na e trabou grandi ku Pastor Bak huntu demas parokianonan di Lagun a hasi. Esaki ta muestra di union i e unidat aki mester prevalesé den tur e kosnan ku nos ta hasi. Ku nos tin e unidat aki nos ta logra hopi kos, no solamente riba e nivel  di parokia pero tambe na nivel di gobièrnu.

E normal nobo ku nos a drenta aden despues di Covid mester ta pa nos un siñal ku nos so,  no por hasi tur kos i  si nos tin union den tur aspekto e pais aki sigur lo logra bai pa dilanti. Nos Obispu ta konvensí ku nos por basta nos ke.

Covid ta un temporada ku ainda no a pasa pero e a siña nos ku sierto kosnan den nos bida nos tin ku hasi otro. E a siña nos ku nos mester tin e abilidat di mira kosnan na un forma distinto i fiha nos metanan riba e kosnan bon ku nos tin den nos.

Pastor Bak ta yen di entusiasmo i ta kontentu ku Obispu a dun’e e oportunidat pa e por traha den e pueblo di Westpunt. E trabounan ta hopi pero ku unidat di tur su parokianonan e ta sigur ku kosnan lo kana bon.

 Hersley Rosario huntu ku dos persona mas a sòru pa e parti musikal i tur hende na final di misa a haña algu di kome i bebe pa bai kuné pa asina evitá aglomerashon dilanti di misa.

Un pabien na Pastor Bak i  parokianonan di misa di Lagun ku nan misa kompletamente restourá.

Riba e potrètnan nos por mira  kon kos a kana djadumingu  mainta .