Despues di 43 aña Cuerpo Policial Aruba a despedi di Sir. Jose “Chaco” Cornelio

ORANJESTAD-Despues di 43 aña di servicio Cuerpo Policial Aruba a despedi di Sir. Jose Cornelio, mihor conoci como Chaco. Un persona cu un trayectoria largo cu a dedica cu alma, pasion, tempo y dedicacion na Cuerpo Policial Aruba.

Sir.. Chaco a cuminsa su carera policial cu solamente 19 aña di edad. Na aña 1978 el a cuminsa como Hulp Agent pa Cuerpo Policial Antiyas. Despues el a sigui na aña 1982 na Straatdienst Oranjestad. E mesun aña aki el a sigui pa Departamento di Narcotica. Pero tabata na aña 1986 na momento cu Aruba a haya su Status Aparte cu e mester a bolbe Scol di Polis bek p’asina e por bira Polis oficialmente.

Como un di e prome klasnan Chaco su carera no a caba, pero a crece den conocimento y cu amplio experencia. Chaco a haya e oportunidad na aña 1988 na unda el a drenta Departamento di Recherche di Oranjestad y t’e cu dia di awe na aña 2021, Chaco a keda labora n’e departamento aki.

Den su tempo liber Chaco a dedica su tempo na muchanan den arte marcial. E ta un persona reconoci den e area aki y un persona den top como referee den e deporte aki. Ta danki na su dedicacion y amor pa locual cu e ta haci Chaco ta un Ridder den Orde van Oranje van Nassau. Un Hall of Famer na nival mundial y Grand Master den diferente arte marcial.

Amigo, famia y coleganan a organisa un despedida chiquito pa Chaco. Como sorpresa a busca Chaco na su cas y asina bou guia di unidad motorisa a dirigi Chaco pa su ultimo dia di trabou hunto cu su amigonan di antes.

“No ta algo cu mi a spera na momento cu mi a wak e unidad motorisa yega mi cas.” Tabata e prome reaccion bou harimento di Chaco.

Amigonan di antes manera Carlos Hodge, sres. Sambo, Paulina, Krozendijk tabata un par di e tantisimo amigonan cu a bin celebra Chaco su ultimo dia.

Chaco a ricibi como reconocimento un petchi di Polis diseña pa sr. Brown y cu a wordo traha na Hulanda. Un atardi yena cu chiste y bon recuerdonan di antes.

Como tradicion Chaco a haci su ultimo yamada via radio di Polis na Central di Polis. Tur unidad y departamento special a duna honor via radio di Polis n’e ultimo yamada y mensahe di Chaco. Un momento cu sigur a yena tur persona cu emocion.  Na final di dia Chaco a traspasa e batuta p’e hoben Recherche cu ta bay sigui y maneha e departamento.

“ E prome cos cu bo mester siña t’e respet y disciplina. Bo no tey pa escala e problema. Un medaya tin tres banda. Prome cu bo kier judge un hende wak tur e bandanan di medaya, hasta e rand ta un banda.”

Danki pa bo esfuerso, dedicacion y tempo na Cuerpo Policial Aruba. Danki na Chaco su famia p’e tempo cu el a dedica na nos cuerpo. Nos comunidad por ta oryugoso cu nos tabatin un persona manera Chaco cu a dedica alma y cuerpo pa combati criminalidad y awor su conocimento a wordo traspasa p’e hobennan. Disfruta di bo pensioen, bo merece esaki y muchu mas! Danki Sir. Chaco!