Desentralisá transporte pashèntnan di Covid ta un desishon preokupante

WILLEMSTAD – Sindikatonan ABVO I CBV ta hopi preokupá ku e desishon ku gerensia di Servisio di Ambulans pa desentralisá e transporte di pashentnan di Covid-19. Ora ku e pandemia a surgi a sentralisá e transporte aki na Zakito, i ta saka e ambulansnan for dje sitio aki pa por duna mihó servisio na komunidat. Entre otro Ora ku e ambulansnan sali na Zakito, kaminda ku a sentralisá nan, e trahadó di ambulans ta bisti un trahe speshal i tin material pa traha kune.
ABVO ni CBV no ta kompronde, ku mientras ku ainda tin Covid-19, Servisio di Ambulans ta desentralisá e servisio aki. Loke ku ta molestiá e sindikatonan tambe, ta e hecho ku nan no a yega na un akuerdo ku Servisio di Ambulans riba e asuntu aki, pero tòg, ta kontinua ku e desentralisashon.
E sindikatonan tin algun tempu ta hala atenshon di gerensia di Servisio di Ambulans, pa na momentu di desentralisá, perkura pa tin sufisiente material na kada post, esun di Banda Bou i na Banda Ariba, meskos ku ta e kaso na Zakito. Mester tin sufisiente personal i ambulans tambe disponibel, pasobra aworaki a pone 1 ambulans disponibel pa transporta pashènt di Corona.
1 luna i mei pasá kaba , e sindikato a indika ku si ke desentralisa, bo mester perkura tambe pa meskos ku tin un kashi di remedi bon ekipa i na temperura, tin tambe na Banda Bou i na Banda Ariba.
Pa atende e asuntu aki gerensia a bisa ku e ta nombra un komishon. Sindikatonan ABVO i CBV a nombra nan miembronan den e komishon. Pero te ku awe, e sindikatonan no a haña kontesta riba entre otro e karedanan di Corona ku personal di Ambulans mester kore, ku pashèntnan di Covid -19.
Kenneth Bremer: Dia 5 di mei gerensia di Servisio di Ambulans a saka un partisipashon ku ta bai desentralisá. Komo reakshon riba e partisipashon aki, e sindikatonan a manda un karta ayera pa gerensia ku e menshon ku te ainda nan nan no a risibi kontesta riba e puntonan di atenshon, pero tog ta kontinua ku e desentralisashon.
Riba esaki gerensia a manda komo kontesta, un rooster kaminda por konkluí ku e desentralisashon ta kuminsa awe tardi 3ór.
ABVO i CBV ta rechasa e aktitut aki i nan a konvoká un reunion general awe merdia 12or pa trata e problema aki ku e miembronan.