Desenas di hoben ta bai studia na Ulanda ku hopi chèns di faya

WILLEMSTAD. Repasando archivonan di notisia riba djadumingu, nos a topa ku un relato revelador i alabes preokupante dje koresponsalnan Kim Hendriksen & John Samson kaminda nan ta señalá ku tur aña sentenares di studiante ta bandoná Kòrsou bordo di vuelonan ku Stichting Studiefinanciering Curaçao ta organisá pero nan a konstatá ku e kantidat di studiante a mengua mientras ku un grupo ku ta den problema a birando mas grandi i tur aña ta un evento emoshonal pa mira studiantenan i famia tuma despedida na Hato, algu impaktante pa e famia i amigunan pero pe studiante mes tambe.
Tur hende ta spera ku nan ta retorná ku un diploma pa yuda nan isla bai dilanti pero realidat ta otro e duo di koresponsal ta konta.
Mas ku mitar dje studiantenan di nos islanan ta bandona nan estudio na kaminda of no ta kaba nan estudio denter di e temporada ku tabata programá. E Defensor di Pueblo ulandes ta haña ku e situashon ta alarmante i ke pa gobiernu tuma medida, Historianan fèrfelu riba kamber i bibienda, e interes mas haltu riba e fiansa i keho riba e mal servisio ta pone ku nan ta preferá si bai riba nan mes ku bou di e bandera di SSC. Algu ku ta hasi e problema mas grandi te hecho ku e studiantenan ta pèrdè for di bista. E grupo di studiantenan aki yama “freemovers” pero no tin kontrol. Fo’i ora nan yega Ulanda nan dominio di idioma ulandes defisiente, nan no ta inkorpora ku e otro studiantenan, nan ta skohe materia di estudio robes, nan no ta bon prepará i falta motivashon. I asina aki un veterano den guia studiante ta mira binti aña kaba kon e kos ta bai.

TIN YUDANSA PRIVÁ
Un dje hendenan ku konose e problema ta señora Alexander-Wawoe kende tin su empresa “My Future Career” ku ta guia diferente freemovers. E ta yuda nan den eskoho di nan materia di estudio, nan emigrashon pa Ulanda i e asistensia ku nan mester frekuentemente. Kontra pago naturalmente……
Komo veterano den e materia ela konstata ku enseñansa na Kòrsou no ta akoplá ku e estudio ku nan a skohe pa sigi na Ulanda i tur aña te mesun problema. Esei pasobra si no siña e muchanan for di hoben pa desaroya nan kapasidat di kompetensia nan lo haña nan den problema.
Pió ta ku ora nan ta kai for di e estudio ta difisil sa unda nan ta a duna nan apoyo. Den esei sí e programa di SSC ta mihó.
E direktor di SSC ta Sidney Justiana konosí den mundu di enseñansa avansá pero e ta kuestiona ken ta traha e sifranan. E sistema di enseñansa na Kòrsou a hopi bieu i gobiernu i e direktivanan di skol no tin vishon komun.