Departamento di Cultura Aruba cu su Proyecto ‘Biografia di Artista di Musica Arubano’

ORANJESTAD-Seccion di Investigacion y Documentacion (SID), di Departamento di Cultura Aruba (DCA) bou auspicio di Ministerio di Cultura a haci un presentacion di un proyecto cu e nomber ‘Biografia di Artista di Musica Arubano’. Esaki a tuma luga riba e dia di e patrona di musica Santa Cecilia, na Biblioteca Nacional Aruba den sala di Diamante. Diesdos artista a ricibi un parti di nan biografia, hunto cu grabacion di nan entrevista, un pin di Aruba, como gesto pa participa den e proyecto y reconocimento pa nan contribucion na Aruba su cultura musical. Por ultimo nan a ricibi un recuerdo den e cuadro di 40 aña di existencia di Departamento di Cultura Aruba. Minister di Cultura Sra. mr Xiomara Ruiz-Maduro a disculpa su mes cu pa motibo imprevisto no por tabata presente. Minister di Enseñansa, Ciencia y Desaroyo Sostenibel, sr. dr. Armando Lampe tabata presente y a hiba palabra den nomber di Gobierno di Aruba.