Den reunion di Parlamento cu a dura 9 ora Presidente di Parlamento a considera cu presupuseto di DOW 2021 ta completamente “uitgeput”

ORANJESTAD- Un biaha mas ta mustra riba e importancia di cambio di mentalidad den Parlamento di Aruba y diahuebs mainta un biaha mas a keda confirma cu e interes politico di partidonan cu ta forma Gobierno, ta riba interes general di e pais.

Kisas e observacion mas sensato cu a wordo haci relaciona cu e reunion aki, tabata esun haci pa Presidente di Parlamento, mr. Edgard Vrolijk kende tambe a mustra cu tin discusion y argumentonan cu a bin dilanti cu no tabata necesario.

Presidente Vrolijk a mustra cu Parlamento a trata un presupuesto di DOW cu ta totalmente “uitgeput”, pues tur placa a wordo gasta caba y tur intento pa haci cualkier cambio, tabata sin sentido.

Na mes momento tin Parlamentarionan nobo cu apenas tin algun luna den Parlamento, tambe a dicidi di participa den e proceso pa controla un presupuesto di DOW cu ya no por wordo controla ya cu practicamente el a ser ehecuta caba.

Sinembargo nan a dicidi di haci cierto observacion, a sugeri cosnan cu p’e presupuesto aki ya no tin sentido y a spera sikiera un di nan bin dilanti y mustra Gobierno cu e tin cu entrega presupuesto 2022  pa caba.

Segun ley di comptabilidad e presupuesto di 2022 mester a yega Parlamento for di dia prome di september caba y si tur cos tabata normal, presupuesto di DOW pa 2022 mester a wordo trata pa Parlamento prome cu fin di aña aki.

Ridiculo y sin sentido tambe t’e hecho cu tin miembro di Parlamento a aplaudi cierto proyecto ehecuta pa DOW manera construccion di algun rotonde, careteranan cu a wordo asfalta, pero e hecho cu ta “felicita” DOW pa haci loke ta su responsabilidad y pa ehecuta loke su presupuesto 2021 a recomenda, ta simplemente un acto di un mentalidad cu falta madures.

Algo mas cu nuebe ora di reunion pa trata un presupuesto cu ta practicametne obsoleto ta muestra di e incapacidad di ehecuta responsabilidad como Parlamentarionan, principalmente esnan cu ta sostene e Gobierno di coalicion.

Pa colmo un presupuesto cu tabata responsabilidad di gabinete Wever Croes I, awor a wordo trata p’e gabinete Wever Croes (II) nobo, caminda e presupuesto 2021 mes, a wordo trata dos luna pasa caminda e propio Ministernan cu a hinca e presupuesto den otro, a sinta como miembronan di Parlamento pa aproba esaki ya cu ainda e constelacion nobo di Parlamento no a tabata oficial.

Ta cosnan cu ta hala atencion tambe di CAFT y Gobierno Hulandes y ningun momento a scucha un di e Parlamentarionan cu ta sostene e actual Gobierno, exigi pa mas pronto posibel presenta e concepto pa 2022 na Parlamento.

Notabel tambe tabata e hecho cu ningun momento a scucha pregunta bin dilanti riba e cantidad di placa cu DOW a usa pa asfalta cantidad di caminda durante di campaña electoral, caminda den varios bario rond e isla, principalmente barionan cu ta barionan di votadornan di MEP, a haya asfalt den record di tempo.

E mentalidad demostra diahuebs ultimo ta decepcionante, ya cu mientras cu tin caranan nobo den Parlamento, algun di nan cu a sigura cu lo bin un aire nobo,  cu lo bin mas transparencia, pero en realidad den e reunion aki a bin resulta cu nan no tin algo nobo pa presenta na pueblo y cu nan lo sigui haci loke Ministernan den Cocolishi ta dicidi cu tin cu pasa.

E solo hecho cu Prome Minister durante di e reunion a bay sinta y reuni cu e dos fraccionnan cu ta sostene Gobierno actual, ta bisa hopi di e falta di capacidad y un confirmacion cu un biaha mas Parlamentarionan ta pone nan mes disponibel pa wordo usa manera marionetanan politico.