Den plèstik resiklá na Colombia… 30 luna di kastigu pa trafikante ku kier a pasa kasi 8 kilo di kokaina

ROTTERDAM. 30 luna di kastigu un tribunal penal na Rotterdam a dikta kontra un kurasoleño ku a purba importá kasi 8 kilo di kokaina na Ulanda pero a kai na kaminda. Manera tabata di spera, su abogado a pidi pa laga su kliente liber pasobra Ministerio Publiko no a proba su kulpa fulminante ya ku ta a base di telefon ku nan a tap, a formulá e akusashon.
Esei en kombinashon ku prueba ku ela bishita Colombia na 2018 no ta sufisiente prueba pasobra no ta den e periodo ei e trafikantenan a manda droga Ulanda. Loke Ministerio Publiko tin ta mensahenan App entre 2 oktober i 30 desèmber 2018 i ku dia 2 november 2018 nan a depositá € 1.500,- riba su kuenta pa e bai ku fakansi.
Manera ela retorná Ulanda, mesora ela yama su kómplisenan pa bin busk’é na Schiphol pasobra e negoshi di resiklá plèstik na Colombia bai bon. Tambe polis a graba ku e lote di ‘plèstik’ lo yega Rotterdam dal dia i ku fulano i tal lo pasa buska esaki. E lote tabata komo prueba i si logra, otro biaha ‘otro biaha nos ta manda 20.000 kilo plèstik resiklá’.
Sinembargo polis a konfiská e lote di plèstik
Na momento di dikta kastigu, wes a resitá e litania familiar di kuantu efekto malu kokaina tin riba sosiedat. Wes a tuma nota ku nunka antes e sospechoso no a kai será pa trafiko di droga.
Konsiderando gravedat gravedat dje delito wes a haña ku mester saka e sospechoso pa hopi tempu for di sirkulashon. Ademas ela hunga un papel grandi den importashon dje droga i ta su persona a mantené kontakto ku e kolombianonan.
Wes a tene kuenta ku ta for di 4 yuni 2019 polis a sera e homber i a pasa dos aña i kuater luna pe kaso a bin dilanti. Tur e tempu aki e tabata den libertat.
Trinta luna di kastigu ta adekuado i ta menos di loke fiskal a pidi ku ta 37 luna.
E ta den libertat for di 30 di ougustus 2019 pero for di momento ku e veredikto bira definitivo, e tin ku bai será.