Den kaso di notario na aña 2002……. Kastigu di prizon tabata dos aña kondishonal!

WILLEMSTAD. Un kaso ku siman pasá a hala masha atenshon ta dje notario ku mester a presentá dilanti wes penal den promé instansia pa supuesto malversashon di plaka ku e notario a kobra klientenan pero ku mester a bai Ontvanger.
Hustamente awe mainta a sali un publikashon spesialisá riba un kaso similar ku a sosode na aña 2002 kaminda tambe un notario reportadamente a malversá sumanan di kliente a paga na belasting ku mester a bai Ontvanger.
Den e kaso di notario Kleinmoedig su abogado mr. Bertie Braam i su sosio den e kaso, a refutá ku tabatin malversashon pero dado kaso mes ku fiskal konvensé wes ku tabatin malversashon, e veredikto mester apliká e prinsipio di igualdat den diktamen di kastigu.
Den e kaso di 2002 tambe Ministerio Publiko a pidi dos aña di kastigu di prizon i wes a dikta e kastigu ei pero totalmente kondishonal.
Esaki ta djis pa ilustra e liña ku eventualmente mester sigi den kaso ku e notario ta kulpabel pero den kaso ku e ta inosente, korte tin ku dikta di akuerdo ku loke su abogado a pidi ku ta libertat total.
E kaso ku nos ta uza komo referensia a sosode na añanan 2002 i 2003 na Sint Maarten
Na tal okashon abogado di e notario a konvensé Korte di Hustisia ku no por kastiga su kliente dos biaha, esta, skrap su nomber for di lista di notario i poné paga butnan grandi.
Korte no a kai pa e argumento ei pasobra ta solamente den kasonan penal no por kastiga un akusado dos biaha: den kasonan fiskal of skòrsing, e regla no ta konta.
Pero for di e tempu ei a bin sali na kla ku situashon ku te awe ta eksisti, esta ku notarionan tin sumanan grandi bou di nan poder ku Ontvanger no ta kobrando i miones di florin ta akumulando riba kuenta dje notarionan.
Den e kaso aki abogado dje notario a mustra korte ku tin varios notario den mesun situashon ku e akusado aki pero Ministerio Publiko no ta persigi nan.

I esei ta trato desigual.
Korte no a bai di akuerdo ku e argumento aki pasobra di bèrdat ku tin diferente notario na Kòrsou ku tin sumanan grandi di Overdracht Belasting ku mester paga Ontvanger pero ta suanan ku nan a kobra te ku 1996 siendo ku den e kaso dje notario na Sint Maarten, a sumanan ku ela kobra riba fechanan mas fresku.
I ademas e notarionan ku no a manda plaka pa Ontvanger ta pasobra nan tin un diferensia di opinion ku Ontvanger.
I finalmente, no t’asina ku si Ontvanger manda kobra nan ta keda sin paga.
Nan ta kla pa paga.
PRUEBA KLARO
Den e kaso di 2002 Korte di Hustisia a haña ku fiskal a proba totalmente ku den e periodo di 1 yanuari 1997 te ku desember 1998 e notario varios biaha a malusá sumanan ku tabata destiná pa paga Ontvanger pero no a hasi esei.
E notario a splika ku no tabatin malversashon di su parti pasobra tabatin sumanan di Overdrachts Belasting ku nunka e klientenan a paga i ku fin di 1998 tabatin sufisiente plaka riba e Rekening Derden pa paga Ontvanger.
I tersero, e hecho ku e notario tabatin sufisiente kapital propio riba e kuenta pa paga Ontvanger, no ta nifika ku e a malversa plaka di Ontvanger.
Ademas e mes a deklara den korte ku no tabatin sufisiente fondo riba e kuenta si Ontvanger a reklama tur loke e tabatin derecho riba dje.
E notario ta un sirbidó publiko i komo tal e tin ku haña mas kastigu ku un siudadano komun.
Korte a uza tur e argumentonan tradishonal à kulpa e notario manera ku ela bergonsá e funshon i a abusá dje konfiansa di su klientenan. E tribunal a husga ku pa regla mester dikta un kastigu di prizon pa e malversashon pero korte a tene kuenta ku ela kometé e delitonan den e periodo di 1997/1998 i ku e periodo rasonabel a pasa pa husgé.
Mientras tantu korte a bah’é komo notario i ela yega na un areglo di pago ku Ontvanger i finalmente Korte a mustra ku Ontvanger mes tambe tin falta den e problema aki.
Esei a pone ku praktikamente tur notario for di tempu di Antia tabatin varios mion florin riba kuenta pa paga Ontvanger pero gobiernu no ta drenta den akshon pa remediá e situashon.
A base di esei Korte a haña ku e mester haña kastigu wèl pero kondishonal: o sea e no ta kai prezu basta e no kometé un delito den tres aña.