Den kaso di asesinato i 300 kilo di kokaina…… Doño di droga i selador korupto a reuni Kòrsou!

WILLEMSTAD. Djamars ultimo Prokurador General na Korte Supremo di Hustisia na Ulanda a rechasá e petishon di e kabesante di un gèng ku a importa 300 kilo di kokaina for di Ecuador pa Rotterdam pero e operashon a frakasá pasobra e kargamentu a yega promé ku e fecha palabrá i no te selador korupto ku mester a laga e droga pasa tabata trahando i asina e operashon a frakasa rotundamente.
E frakaso aki tabatin konsekuensia fatal pasobra despues doño dje droga a bai reklamá e 1,1 mion euro ku ela paga e selador korupto i ora ku esaki a ninga di duna e sèn bèk, doño dje droga a tuma bengansa i a likidá e selador…. robes!
Ku más bengansa ainda e trafikante i kontrabandista a persigi e selador i su famia pero ya reshèrshe antidroga tabata riba su pista i tabata graba su kombersashonnan ku e selador i a logra pone man i arest’é promé ku e por a mata selador.
Origen dje drama aki tabata na Kòrsou kaminda den e kaso aki hustu a paga pa pekador pero lo más kurioso dje kaso tabata ku henter e operashon a keda planifiká aki na Kòrsou den un restorant na Brakapoti foi inisio.
Afortunadamente outoridatnan ulandes su servisio di inteligensia a funshoná ku nan por a konfiská e droga promé ku ela subi merkado ounke ku e otro hende inosente a paga e preis pero doño dje droga a haña un kastigu di dies aña prezu ku ela apelá te den Korte Supremo.
Su abogado a bin ku un ráfaga di argumento pa desbaratá e argumentonan di Prokurador P.G. Vegter pero na final ela rechasá nan tur i e veredikto penal a keda konfirmá.
E kontrabanda di 300 kilo di kokaina for di Ecuador den un kargamentu di anasa a sosode ku koperashon di un alto funshonario di duana na Rotterdam.
Tabata djaluna 9 di desèmber 2013 ku reshèrshe di duana a tira inval bordo dje barku pa konfiska e droga.
Esei a sosode despues ku nan a graba diferente yamada telefóniko entre doño dje droga i su kompinchenan.
Ta durante e yamadanan aki reshèrshe a haña sa ku tabatin selador korupto den wega.
Nan a laga chèk e homber mesora i a haña sa ku ta na duana e ta traha i tin hopi plaka ku e ta manehá di un manera masha diskreto i disiplina.
Ora e papia na telefon ta riba asuntunan privá so e ta papia.
Nan a haña sa ku ela kumpra un kas ku ta riba su mes riba un tereno i no un ‘rijtjeshuis’ ku ela rekonstrui pa masha plaka.
E kas ta masha bon proteha ku sistemanan elektroniko i bentana di glas antibala.
Ora e bai ku fakansi e ta bin Kòrsou pa por lo menos 3 siman i ta biba den stail kumprando oloshi karu i ta kore den un BMW di € 137.000,—.
E ta hopi na kas kaminda su atministrador ta bin bishit’é pa atende su asuntunan.
Masha importante ta ku e selador sa debidamente ku aña nobo di 2014 doño dje droga a laga likidá un selador pero ku ta su persona nan kier a likidá.
E “cherry riba e bolo” dje investigashon te hecho ku e akusado prinsipal a reuni na Kòrsou pasobra e amtenar korupto tin dos kas di playa na Korsou.
Nan a sigi nan pasonan tur kaminda durante e enkuentro na Kòrsou i a haña konfirmashon durante e fakansi na Kòrsou nan a topa dia 6 di ougustus 9’or di anochi den restorant Boathouse na Brakkeput Ariba.

Despues ku Hustisia a arestá e selador korupto ela rekonosé ku e tabata di fakansi

na Kòrsou huntu ku doño dje droga pero no ku su famia.