Den demanda pa servisio inkompleto: Wes a a ordená Corendon baha 20% di preis dje pakete

WILLEMSTAD. Pa motibu ku Corendon Hotel no a kumpli kabalmente ku tur e servisionan ku nan a ofresé den nan pakete di biahe un tribunal na Noord-Holland a ordená Corendon pa restitui 20% dje preis di pakete di fakansi pasobra e hotel no a ofresé tur e atrakshonnan ku nan a propagá.
E turista a demanda Corendon for di yanuari aña pasá i durante tratamentu dje kaso yuni aña pasá ta masha reklamo e turista ulandes tabatin riba e servisio ku ela haña plaka ku ela paga pa pasa fakansi na Kòrsou.
Konkretamente: e turista a kumpra pakete di biahe pa keda den 15 dia den resort Hotel Corendon Mangrove Beach Resort pagando € 11.029,45 pa tur kos inklusive pasashi di avion.
Nan a lesa ku ta un hotel di 5 strea nobo-nobo pero e homber a keda malamente desilushoná i di retorno na Ulanda ela hiba Corendon korte pasobra e hotel tabata un desaster eksigiendo pago di tur e plaka ku ela paga.

LISTA DI REKLAMO

Den su demanda ela reklamá ku kashinan di paña tabata tur na stòf, e kamber no tabata kla
i e èrko tabata supla aire kayente, no tabatin habon den baño, e bufete ku baki di kuminda mitar yen, no tabatin pelukeria, fitness, mini, tienerclub, aquapark, foodcorner, tur kuminda tabata friu, kurú, vies i sin variashon i pa kolmo kontratista a kuminsa traha for di 7or di mainta strobando nan trankilidat.
Ela reklamá pero nada!
Corendon a ofrese e turista un deskuento di € 1.100,00 pero ela ninga.

DEFENSA DI CORENDON

Corendon ta desmenti tur e reklamonan i a ofresé un deskuento di 10% riba e suma total.
Segun wes, si Corendon no a kumpli nan mester paga kompensashon pero e turista a bin ku lista di reklamo pero Corendon a bari tur for di mesa kuminsando ku e reklamo ku nan bira malu despues di a kome den hotel pero nan a kome pafó di hotel tambe.

E turista a saka foto dje bufèt pero esei no ta demostra nada.
Hasta a ofresé nan alternativa pero e kliente a ninga.
Un deskuento ta na su lugá pasobra nan no a haña servisio kompleto.
Konsiderando tur esaki wes a haña ku Corendon no a kumpli i mester restitui e turista € 2.205,89.
Riba esei Corendon mester paga gastunan legal dje kaso direktamente pues na tur € 2.536,77.