Den demanda kontra TUI…. Abogado hulandes a pèrdè kaso pa su kliente pegando barkunan monumental

AMSTERDAM. Algun dékada tabatin un pelikula kómiko masha prèt mes kua tabata yama “The gang that could’not shoot straight” ku tabata trata di poko bandidu ku tabata hasi tur kos robes ora di bai hecha baina.
E kaso ku ta sigi a kontinuashon tin di haber ku un biahe ku avion ku lamentablemente basta aña kaba a bira un doló di ‘derrière’ pa basta pasahero pa motibu di eror i fayo ku kompanianan di aviashon ta kometé.
Esei mes a pone ku na Europa mayoria di paisnan tin organisashon di protekshon di derecho di biahero ku ta hiba nan kaso korte pa demanda un kompania ku laga nan na kaya.
Den e kaso ku nos ta referi na dje e abogado a bruwa kos i a pone ku wes no por a duna e kliente kompensashon basá riba datonan robes.
E demanda ku e abogado a entrega na nomber dje kliente tabata asina robes ku normalmente den kasonan igual e wes mes a korehi e datonan pero den e kaso aki e fayonan tabata monumental i garafal.
E biahero a hinka e kaso den man di AirHelp GmbH (NV na aleman!)
na Berlin i nan abogado tabata mr. D.E. Lof ku a entama e kaso kontra TUI Airlines na Rijswijk i nan abogado tabata señora mr. M. Lustenhouwer.
E programa di buelo: dos pasahero tabatin reservashon pa bula dia 28 di desèmber 2021 for di Hato pa Schiphol via Boneiru.
E ruta original tabata
· Amsterdam – Kòrsou – Boneiru – Amsterdam.
Komo ku un tripulante a kai afó TUI a ehekutá e buelo al reves esta:
· Amsterdam – Kòrsou – Boneiru – Kòrsou – Amsterdam.
Esei a pone ku e buelo tabatin un retraso di mas ku 21 ora pa kubri un distansia di 7.834 kilometer.
E dos pasaheronan a sede nan reklamo kontra TUI na Airhelp na Alemania ku na su turno a buska un abogado na Hulanda.
E abogado a demandá TUI pa paga Airhelp 1.200,00 euro ku interes te dia nan paga.
AirHelp a argumentá ku TUI a anulá e buelo i no por a informá nan dos siman promé ku a anulá e buelo.

Esei ta nifika ku ta € 1.200,00 so nan por a haña.

ARGUMENTONAN DEVASTADOR

E argumentonan di TUI kontra e demanda tabata devastador.
Primeramente AirHelp a pretendé ku TUI a anulá e buelo siendo ku ta un retraso di 21 ora tabatin.
Na di dos lugá TUI a argumentá ku pa motibunan di forsa mayor nan a ehekutá e buelo i no tin reklamo kontra forsa mayor.
AirHelp a pretendé ku TUI a anulá e buelo loke no ta bèrdat sino ku ta retrasá e buelo tabata.
Despues AirHelp mes ta papia di retraso i ta kontradesi su mes.
I ‘last but not least’, AirHelp a buska un abogado di kual mester asumi ku e konose reglanan di lei.
Por lo tantu AirHelp a pèrdè e kaso pe klientenan di TUI.